ከፈረሱ ጋሪው የቀደመበት በማኅበረ ቅዱሳን የቀረበው የአዲስ አበባ ሀ/ስብከት አዲሱ ጥናት!



ማኅበረ ቅዱሳን ባልታጠበ እጁ የመቅደሱን አገልግሎት ለመናኘትና የአስተዳደሩን ወንበር ለመጨበጥ ላይ ታች ማለት የጀመረው ገና አቡነ ጳውሎስን ገፍቶ እስከሞት ድረስ ከመታገሉ አስቀድሞ ነው። ተላላኪ ጳጳሳቱን ካሰማራ በኋላ በአዋጅ ባለባቸው ህመም ሳቢያ እንደሞቱ የሚነገርላቸው እና በውስጥ አዋቂዎች ደግሞ ከህመሙ ባሻገር የሰው እጅም አለበት የሚለውን  የስውር አካሄድን ይትበሃል የተመለከተ የአቡነ ጳውሎስ ኅልፈት  ከመድረሱ በፊት ማኅበሩ ራሱን ከሰንበት ት/ቤቶች መምሪያ ነጻ በማውጣት በቀጥታ ተጠሪነቱ ለሲኖዶሱና ለሥራ አስኪያጁ እንዲሆን ነጋሪት አስመታ። ከዚህ አዋጅ በኋላ ማኅበረ ቅዱሳን የማይደፈር፤ የማይነካ የቤተ ክህነቱ አንበሳ ሆነ።  በግንቦቱ የ2004 ዓ/ም  ሲኖዶስ ላይ ይህንን አስወስኖ ድል በድል በሆነበት ዋዜማ ሟቹን ፓትርያርክ አቡነ ጳውሎስ እንዲህ ብለን ነግረናቸው ነበር።
«አመኑንም አላመኑም ፓትርያርክ ጳውሎስ፤አንድ ነገር አስረግጠን እንነግርዎታለን። በማኅበረ ቅዱሳንና በደጋፊዎቹ ጳጳሳት ግብዓተ መሬትዎ ሊፈጸም የቀረው ጥቂት ነው» ብለን ነበር። [1]
እንዳልነውም ይህንን ከተናገርን ከሁለት ወራት በኋላ አቡነ ጳውሎስ ወደማያልፈው ዓለም ለአንዴና ለመጨረሻ ጊዜ ሄዱ። ነብይ ስለሆንን ወይም ከሰው የተለየ ራእይ ስለመጣልን አልነበረም። በወቅቱ የነበረው የማኅበሩና በገዛ እጃቸው ጰጵሰው የጥላቻ ፈረስ ያሰገራቸው ጳጳሳት አካሄድ ጤናማ ስላልነበር አንድ ነገር ሊመጣ እንዳለ ይጠቁመን ነበርና ነው። ያልነውም ሆነ። ማኅበሩም ተደላድሎ ቤተ ክህነቱን ያዘ። ከእንግዲህ ምን ቀረው ማለት ነው? ቤተ መንግሥቱ? በዚህ ዙሪያ በሌላ ርእስ እንመለስበታለን።

 አሁን አንድ ነገር እዚህ ላይ አስረግጠን በመናገር ወደርእሰ ጉዳያችን እናምራ።
ጳጳሳቱ አንድም በራስ የመተማመን ጉድለት ባመጣው ፍርሃት ለማኅበሩ አጎብድደዋል፤ በሌላም አንድ ምክንያት ግለ ነውራቸውን አደባባይ እንዳያወጣ የበደል ምርኮኝነታቸውን አስበው ራሳቸውን ለማኅበረ ቅዱሳን አሳልፈው ሰጥተዋል። ይሁን እንጂ፤
«አመናችሁም፤ አላመናችሁም እናንተም የአባ ጳውሎስን የጥላቻ ጽዋ ከማኅበረ ቅዱሳን ዋንጫ በተራችሁና በሰዓቱ ትጎነጫላችሁ። ወደማይቀረውም ሞት ተራ በተራ በጊዜአችሁም፤ አለጊዜአችሁም ትሸኛላችሁ፤ በሕይወት እያለን ይህንን የማኅበረ ቅዱሳንን ሚዛን ስትቀበሉ እናያለን፤ ያኔ ደግሞ እንደዚህ ብለናችሁ ነበር እንላለን» ይህም ደግሞ በቅርቡ ይጀምራል»
ከአቡነ ጳውሎስ ሞት በኋላ ሲኖዶስ ማለት ማኅበረ ቅዱሳን ነው። ቀንደኛ የማኅበሩ መዘውሮች ደግሞ አፍንጫና ጆሮ በመቁረጥ በራሱ የተአምር መጽሐፍ ላይ የተመሰከረለት የዘርዓ ያዕቆብ ደቀመዛሙርት ናቸው። በእርግጥ የማኅበሩን እርጥባን እየተቀበሉ በመናጆነት የሚያገለግሉ የሉም ማለት አይደለም። እነዚህ የዘርዓ ያዕቆብ ጉዶች በረቀቀ ስልት ቤተ ክህነቱን በእጃቸው አድርገዋል። ዋነኛ መፈክራቸው ቤተ ክህነትን « በገንዘባችን፤ በጉልበታችን፤ በእውቀታችን እናገለግላለን» ነው። ገንዘባቸውን  እንደሆነ ቤተ ክህነት በጭራሽ አታውቀውም። ጉልበታቸውንም  ቢሆን እንደአበራ ሞላ በአካባቢ ጽዳት ተሰማርተው ወይም  ጥቃቅንና አነስተኛ አቋቁመው ስራ አጥ ካህናቱን ወደስራ ሲያስገቡ አላየንም። እውቀታቸውን ግን እነሆ ለአዲስ አበባ ሀ/ስብከት ባቀረቡት ጥናት ሽፋን የቁጥጥር መረባቸውን ሲዘረጉ አይተናል። ይህም የረጅም ጊዜ ህልማቸውን እውን ያደረጉበት እውቀት በመሆኑ ቤተ ክህነት የጀመረችው የቁልቁለት መንገድ ነው ብሎ መናገር ይቻላል። መጨረሻውም እንደማያምር ጀማሪውን አይቶ መተንበይ አይከብድም። ይህንን እንድንል የሚያደርጉን ምክንያቶች አሉ። በጥቂቱ እንያቸው።
1/ የፕሮጀክት ጥናቱ አጠቃላይ የቤተ ክርስቲያኒቱ ችግሮችን የዳሰሰ መሆን ነበረበት። የችግሮቹን መግፍኢ ምክንያቶች፤ ያስከተሉት ውጤትና የመፍትሄ መንገዶችን ያመላከተ ሊሆን ይገባዋል።  የጥናቱ ዝርዝር ሁሉንም አሳታፊ በሆነ ውይይት ዳብሮ ለመፍትሄና አፈጻጸም በሚያመች መልኩ ተዘጋጅቶ አተገባበሩ ግን ለናሙና በተመረጠ አንዱ ሀ/ስብከት መሆን በተገባው ነበር እንላለን። እየሆነ ያለው ግን ማኅበሩ በሚነዳቸው ጳጳስ ፈቃጅነትና ማኅበሩ በሚዘውረው ቋሚ ሲኖዶስ ይሁንታ ከማኅበሩ ቤተ ክህነቷን የመቆጣጠር ምኞት ተፈብርኮ አዲስ አበባ ላይ የመዋቅር ብረዛ ችካል መትከል ተጀመረ።
2/ በአጠቃላይ የቤተ ክርስቲያኒቱ ችግሮች ላይ ሊደረግ የሚገባው ሁለ ገብ ጥናት የቤተ ክርስቲያኒቱን አባላት፤ ሊቃውንት፤ ምሁራን፤ የሕግ አዋቂዎች፤  ጋዜጠኞች፤ ስልጣን ያላቸው ከፍተኛ ሹማምንት፤ የዩኒቨርሲቲ ምሁራን ፤ የቤተ ክርስቲያኒቱ መሪዎች የተካተቱበትና የቤተ ክርስቲያኒቱ እድገትና ልማት የሚመለከታቸው ሁሉ ተቀናጅተው ይህን የማስተባባር ኃላፊነት ቢቻል በአንድ ሊቀ ጳጳስ የሚመራ ራሱን የቻለ ክፍል ተዋቅሮ መካሄድ በተገባው ነበር። ጋኖች አለቁና ማኅበረ ቅዱሳን አርቃቂ ሆኖ ጳጳሳቱ ከየትም ይምጣ እንጂ እንቀበላለን ብለው አረፉ። በማፈሪያዎች ዘመን የሚያሳፍር ነገር የለምና ብዙም አያስገርምም።
3/ ቤተ ክርስቲያኒቱ በሥጋዊ ወመንፈሳዊ አገልግሎቷ የሚጠበቅባትን ያህል እየተራመደች እንዳይደለ እርግጥ ነው። በአብዛኛው ውጫዊ ምክንያቶች እንደሆነ ተደርጎ ቢወሰድም፤ ለድክመቷ በዋናነት መነሳት ያለበት ከውስጧ ባለው ጉድለት መሆኑን ማወቅ ተገቢ ነው። ሲኖዶስና የሲኖዶስ የሕግ አመራር የዘመኑን የቤተ ክርስቲያን ሁኔታ የተመለከተ ስለመሆኑ እንዲሁም የቤተ ክርስቲያኒቱ አጠቃላይ የመዋቅር ዝርጋታው፤ አተገባበሩ፤ መመሪያውና ደንቦቿ ሁሉ ችግሮቿን የቃኙ፤ መፍትሄ ማምጣት የሚችሉና የሚያራምዱ አይደሉም። ቃለ ዓዋዲ የተባለው ደንብ በምንም መልኩ የዛሬይቱን ቤተ ክርስቲያን የማስተዳደር አቅም የሌለው ስለመሆኑ በማስረጃ አስደግፎ መናገር ይቻላል። ስለሆነም አጠቃላይ ጥናት ያስፈልጋል ሲባል ይህንን የተመለከተ መሆን ስላለበት ጭምር ነው። አንዱን ጥሎ አንዱን በማንጠልጠል የአዲስ አበባ ሀ/ስብከትን ችግር ለብቻው ለመፍታት በፍጹም አይቻልም። የጳጳሳቱ ስሜትና የማኅበረ ቅዱሳን መንቀዥቀዥ ችግሩን ከማወሳሰብ በስተቀር የችግሩን ሰንኮፍ በፍጹም አይነቅልም።
4/ እስካሁን ያልተነገረለትና ሊነገርም ያልተወደደው የቤተ ክርስቲያኒቱ ችግር መንፈሳዊ ብልጽግናዋን የተመለከተው ክፍል ነው። በእርግጥ የአፄ ዘርዓያዕቆብ ትራፊዎች የቤተ ክርስቲያኒቱን ጥንታዊነትና ሐዋርያዊ አስተምህሮዋን የበረዘ የብርሃን ወረደልን ደብረ ብርሃናዊ ዜማ በጭራሽ እንዲነካ አይፈልጉም። የአባ እስጢፋኖስና ደቀ መዛሙርቱ የአፍንጫና ጆሮ መቆረጥን ተገቢነት ዛሬም እንደታመነበት እንዲቀጥል ይፈልጋሉ። ቤተ ክርስቲያኒቱ መከራን የተቀበለችበትን የክርስቶስን ወንጌል ወደጎን ገፍተው አለያም ወንጌሉን ጨብጠናል ለማለት ብቻ መሳ መሳ የሚራመዱት ተረት፤ እንቆቅልሽና አልፎ ተርፎም ክህደት ያለባቸው አስተምህሮዎች በጥናቱ ውስጥ በመካተት እርምት ሊወሰድባቸው የሚገባቸውን በቃለ እግዚአብሔር ሚዛንነት የመለየት ስራ ፈጽሞ ሊታለፍ የማይገባው ነው። ዘመናዊው አስተዳደር ያለመንፈሳዊ ልማት በጭራሽ አይታሰብም።
 የሰይጣን መነኮሰ ክህደትና እርምት ሲነገር ለምን ይሄ ተነክቶ በማለት ጸጉራቸው እንደጃርት እሾክ ከሚቆመው መካከል ማኅበረ ቅዱሳን አንዱ ነው። ይህ የተረት አባት የሆነ ማኅበር ነው እንግዲህ ሕግ አርቃቂ የሆነልን። ስለዚህ በወርቅ የቃለ ወንጌል ወራጅና ቋሚ ዐምድ የተተከለችው ቤተ ክርስቲያን በዘመናት ውስጥ ማንም ሳይፈቅድላቸው ገብተው የሸረሪት ድራቸውን ያደሩባት የዘመን እራፊዎች ጸድተው መገኘቷ አገልግሎቷን ምሉዕ፤ ክብሯንም በሚጠሏት ላይ ሳይቀር ከፍ ከፍ እንድትል ያደርጋታል። ደርግም፤ ኢህአዴግም ገፉን እያሉ ማልቀስ መነሻው የቀደመ መንፈሳዊ ክብሯ ስለቀነሰ ካልሆነ ሲያቦኩንና ሲጋግሩን አናይም ነበር።
ስለሆነም ከላይ ባየናቸው አራት ዋና ዋና መግፍኢ ምክንያቶች የተነሳ በአዲስ አበባ ሀ/ስብከት ላይ የቀረበው የማኅበረ ቅዱሳን ጥናት ተብዬ ከፈረሱ ጋሪው የቀደመበት ነው ማለት ይቻላል። በየግል ጋዜጣው የላኩትን ጽሁፍ መልሶ እንደአዲስ ግኝት በዜና መልክ ማቅረብ ወሬ ማብዛት የሚወድ የወፈፌ ስራ እንጂ የቤተ ክርስቲያን ችግር እንደሰጎን እንቁላል አትኩሮ የተመለከተ የመልካም ዘር ተስፈኛ አስተሳሰብ አይደለም። ስለዚህ ይንን ጋሪው ከፈረሱ የቀደመበትን ጥናት በየትም ይምጣ ቀልደኞችን ጥሎ ጋሪው ፈረሱን የሚጎትትበት አግባብ ቶሎ መፍትሄ ይሰጠው።
------------------------------------------------------
Share this article :

+ የተሰጡ አስተያየቶች + 1 የተሰጡ አስተያየቶች

Anonymous
January 2, 2014 at 11:20 PM

የተሃድሶ መግነን ከአባ ጳውሎስ ጋር እንደ ጠዋት ጤዛ ጠፍቷል። ከአንተ አባባል በማደስ

ዋው መሻሻል ብፁዕ ወቅዱስ አልክ?
ብፅእት ወቅድስት ድንግል ማሪያም ይሄን የደነደነና በምንፍቅና የተሞላ ልብህን በምልጃዋ ታስተካክልልህ። መቼም አይዋጥልህም።


ስሙን ለሰው አዋሰው ይባል የለ? መናፍቁና ፀረ ወንጌሉማ አንተና ራሳችሁን በ30 ዲናር የሸጣችሁ ጓዶችህ ናችሁ። እንደፈሪሳዊ በውሸት ከመክሰስ በስተቀር ምንም የማታውቁ ጉዶች።

የወንድሞች ከሳሽ ግልገል ተሀድሶና የጴንጤ ተቀጣሪ ተላላኪዎች፤ ቀኑን ሙሉ ማቅ፥ ማህበረ ቅዱሳን እያላችሁ ስትከሱ ነው የምትውሉት። ፈሪሳዊያን ኢየሱስን ለቄሳር ሲከሱ በመንግስትህ መጣብህ እያሉ እንደነበረው አንተና መሰሎችህ ግልገል ጴንጤዎችም ለመንግስት ማቅ እኮ መንግስት ሊሆን ነው የሚፈልገው፤ ካልፈረሰ፥ የሸዋን መንግስት ሊመለስ ነው የሚፈልገው እያላችሁ አይደል እንዴ የክስ መአት ከቤተክህነት እስከ ደህንነት ቢሮ የምትደረድሩት?

በአባ ጳውሎስ ሞትማ እናንተም ግብአተ መሬታችሁ ተፈፀመ። ተንፈራገጣችሁ፥ ጣራችሁ ከመላላጥ በስተቀር ምንም ሳትፈጥሩ ቀራችሁ። ብራችሁ በከንቱ ፈሰሰ። በቀላሉ እንኳን ነጋዴው አሸናፊ አባ ጳውሎስ ሲያስነጥሱ መሃረብ በሚያቀርብበት ወቅት ቤተ ጳውሎስ የሚል መካነ ድር ነበረው፤ ሲሞቱበት ያንን ሰርዞ በራሱ ስም ይፅፍ ጀመር።ምስኪን። እሱም ተወገዘ።

ሙስናውና ንቅዘቱንማ እነ እጅጋየሁን፤ ኤልያስን፤ ሰረቀን ታካችሁ ስታስፋፉ አልነበር እንዴ? ለአባ ጳውሎስ እኮ ሃውልት እስከማቆም ሄዳችኋል። በጋሻውና ኤልዛቤል አልነበሩ እንዴ አደራጆቹ?

ጳጳሶቹ የናንተ ማስፈራራትና መደለያ ተቋቁመው፥ ተወጥተው ነው ከማህበሩ መውጣት ያልቻሉት? እናንተ ስማቸውን ካጠፋችሁት የበለጠ የሚጠፋ ስም አላቸው? በምርቃና ምን ያላላችኋቸው አለ? ሌላ እናንተ የማታውቁት አለባቸው? አንተ እንኳን እዚህ አቡነ ጎርጎርዮስን ስማቸውን ስታጠፋ አልነበር? አባ ሰላማ፤ ሙሉጋኔን ወልደሰይጣን ወይም ሙሉጌታና ዌብ ሳይቱ አውደምህረትና አንተ አቡነ ሳሙኤልን፤ አባ አብርሃምን፤ አባ ዲዮስቆሮስና ሌሎቹን ስም ስታጠፉ የምትውሉት? ተራ አሉባልተኞች፤ አንሶላ አጋፈናል ባይ ባለጌዎች። ደሞ ወንጌል እናውቃለን ባይ ግብዝ አስመሳዮች።

በሁለት፥ በሶስት ቢለዋ መብላት ለምዳችሁ እንዴት ለእውነትና ለእውነት ትቆሙ። የጴንጤ ተላላኪዎች፤ ኢትዮጵያ ውስጥ ስትሆኑ የቤተ ክርስቲያን ተቆርቋሪ፤ ውጪ ስትወጡ የስደተኛው ተቆርቋሪ አይደል እንዴ የምትሆኑት? ይሄን አይደል እንዴ የምታደርጉት? ለምሳሌ ትዝታው ከሰረቀ ጋር ወግኖ ማህበሩን ለማፍረስ ተሯሯጠ። እንደውም ከጴንጤ በሚያገኘው ፈንድ በአቋቋመው የEBS ቲቪ ፕሮግራሙን ወክሎ ማቅን ከሰረቀ ጋር ሲከስ ቆየና አሜሪካ ሲመጣ የት ገባ ስደተኛው ሲኖዶስ። አቤት ሁለት፤ ሶስት ቢላ። እናንተ ጥቅም ካስገኘ የማትሸጡት ነገር የለም።

የፓለቲካ ክስህማ ያው እንደናንተ ግብዞች ከሆኑት ከፈሪሳዊያን የተማራችሁት ስለሆነ አይፈረድብህም። ርዕዮት የተባለችው ጋዜጠኛ ፎቶ አንስታ ለኤልያስ ክፍሌ በመላኳ እስር ቤት ናት። ኤልያስ መንግስት በሽብርተኝነት የከሰሰው ሰው ነው። ኤልያስ እንደናንተ ገንዘብ ካወጣ የማይሸጠው የሌለ ግለሰብ ነው። ለማቅ ያለው ጥላቻ ለወያኔ ካለውም ይበልጣል። ይሄን ሁሉ ወጣት ይዞ ወያኔን ስላልተቃወመለት ይጠላዋል። የሱ ሁለት የማይቀየሩ ጠላቶቹ ሁለቱ ናቸው። ልክ እንደሱ በጥላቻ የተሞላው ሙሉጌታ ወይም ጓደኞቹ እንደሚጠሩት ሙሉጋኔን ዲያቆን የሚለውን ስም ሳይጥል የፓለቲካ ዝባዝንኬና ማቅን የሚሳደብ ማንኛውንም ፅሁፍ ያወጣለታል። ሙሉጋኔን ከኤልያስ የሚለየው በአሁኑ ጊዜ ማቅ ብቻ ነው ጠላቱ። ወያኔን በመስደብ የተነሳው መሞነጫጨር አሁን በግልፅ የወያኔ ደጋፊነቱን አስመስክሯል፤ተገለበጠ ማለት ነው። ታዲያ ይሄ ከ“አሸባሪ” ጋር የተባበረ ፓለቲከኛ እያለ ወዴት ወዴት ነው?


ሲጠቃለል ያልበላህን አትከክ። አይናችሁ ውስጥ ያለውን ግንድ አውጡ። ምንፍቅናህን ይዘህ ከሚመስሉህ ጋር የራስህን እምነት አራምድ። እስከመቼ በማታለል ትኖራላችሁ?

Post a Comment

አስተያየቶች

 
Support : | |
Copyright © 2011. ደጀ ብርሃን dejebirhan - All Rights Reserved

Proudly powered by Blogger