«እስኪ በቁጣ ሳይኾን በጥሞና ነገሩን አስተውሉት!»

(ይህ ጽሁፍ በአባ ሰላማ መካነ ድር ላይ አንድ አስተያየት ሰጪ ያቀረበው ሲሆን ስለማኅበረ ቅዱሳን ወቅታዊ ሁኔታ በአጭሩ ስለገለጸ ማቅረቡን ወደነዋል።)

የማኅበረ ቅዱሳንና ደጋፊዎቹ ትልቁ ችግር ይኽ ይመስለኛል፡፡ አንደኛ፣ የነገረ መለኮት ዕውቀት የላቸውም፡፡ ኹለተኛ፣ ራሳቸውን የቤተክርስቲያን ወታደሮች አድርገው ይስላሉ፡፡ እነርሱ የቤተ ክርስቲያቱ ወታደሮች ናቸው የሚለውን ሐሳብ የተቀበለ ኹሉ ከእነርሱ ጋር የማይተባበር ኹሉ የቤተ ክርስቲያን ጠላት ነው የሚለውን አቀንቅኖት መቀበሉ አይቀርለትም፡፡ “ማኅበረ ቅዱሳን የቤተ ክርስቲያን ጠበቃ ነው! የቤተ ክርስቲያኒቱ የመከላከያ ሠራዊት ነው!” የሚለው ዐረፍተ ነገር በራሱ የጽንፈኝነት ወጥመድ አለበት፡፡ ምክንያቱም ጠበቃ የምንፈልገው የተጠቂነት ፍርኀት ሲኖርብን ነውና፡፡ ምናልባት ይኽ ነገሮችን ጥቁር ወይም ነጭ ብቻ ናቸው ከሚለው ጽንፈኝነት ከሰፈነበት ባህላችን የተወለደ ይመስለኛል፡፡ አለማወቅ ላይ ፍርኀት ሲጨመርበት ጽንፈኝነት መወለዱ አይቀርም፡፡ (ጌታችን ኢየሱስ ክርስቶስ ሐዋርያትን “ምስክሮቼ ናችኹ፡፡” እንጂ “ጠበቆቼ ናችኹ፡፡” አላለም፡፡)
ዲያቆን ዳንኤል ክብረት አላስተዋለው እንደኾነ እንጃ እንጂ የተናገረው ነገር የማኅበረ ቅዱሳንን ጽንፈኝነት በደንብ ያሳያል፡፡ ማኅበሩንም በመንግሥት በደንብ ሊያስመታው ይችላል፡፡ እኛ የምንለውን የማይሉ፣ በእኛ ቅኝት ያላቀነቀኑ ኹሉ የቤተ ክርስቲያኒቷን ህልውና ለማጥፋት የሚታገሉ ናቸው ከማለት በላይ ጽንፈኝነት አለን? ዳንኤል ይኽን በማለቱ የማኅበሩን እውነተኛ ማንነት ዐደባባይ አውጥቶታል፡፡ ጽንፈኛ ደግሞ ከራሱ ውጪ ማንንም ለመስማት ፈቃደኛ አይደለም፡፡


የሰለፊዎችና የማኅበረ ቅዱሳን አንዱ የጋራ ነጥብ ይኽ ነው- ከእነርሱ ውጪ ማንም ትክክል አይመስላቸውም፡፡ ከራሳቸውና ከደጋፊዎቻቸው ድምፅ ውጪ ማንንም ማድመጥ አይፈልጉም፡፡ እነርሱም ኾነ ደጋፊዎቻቸው ደግሞ (ብዙዎቹን እንዳየኹት) ከፍተኛ የኾነ የነገረ መለኮት ዕውቀት እጥረት ያለባቸው ናቸው፡፡ እነርሱ ከሚያውቁት የተለየ ሐሳብ የሚያነሣ ሰው ሞቱ በደጁ ነው፡፡ በጥይት ባይገድሉት እንኳ ስሙን በማጥፋት ማኅበራዊ ሕይወቱን ይገድሉበታል፡፡ ከሀገር ያሰድዱታል፡፡ ተሰድዶም ግን ዕረፍት አይሰጡትም፡፡ ለምሳሌ፣ እነ አባ ወልደ ትንሣኤን፣ እነ ቀሲስ መላኩን፣ ወዘተ. ማየት በቂ ይመስለኛል፡፡ እነ አቡነ መርሐ ክርስቶስን፣ ዓለማየኹ ሞገስን፣ ዐፈሩን ገለባ ያድርግላቸውና አቡነ ጳውሎስን፣ መጋቤ ብሉይ ሰይፈ ሥላሴን ጭምር መናፍቅ ብሎ ስም ለመለጠፍ የደፈረ ማኅበር ነው- ማኅበረ ቅዱሳን፡፡ ሲኖዶሱን ሳይቀር እጁን እየጠመዘዘ የቤተ ክርስቲያን ልጆችን ያስወገዘ ማኅበር ነው፡፡ ይኽንን ማየት ከፈለግን፣ በ2002 ዓ.ም. ሲኖዶሱ አወገዛቸው የተባሉት ሰዎች ስም ዝርዝር ያለበትን ዶሴ፣ የሊቃውንት ጉባኤ የሚባለው የፈረመበትን ዶሴና ማኅበሩ ሰዎቹን የከሰሰበትን ዶሴ ማነጻጸር ይበቃል፡፡ የሚሌኒየሙ መጽሐፍ ቅዱስ በሚባለው ውስጥ ከአበው ትምህርት ውጪ በኾነ መልኩ ያልተጻፈው ነገር ተተርጉሞ እንዲቀርብ የተደረገውም የማኅበረ ቅዱሳን አለማወቅ ቤተክርስቲያኒቱ ላይ ባሳረፈባት ተጽዕኖ ይመስለኛል፡፡ በቤተ ክርስቲያን ታሪክ ከየይሖዋ ምስክሮች ቀጥሎ እንዲኽ የተበረዘ የመጽሐፍ ቅዱስ ትርጉም ያዘጋጀች የመጀመሪያዋ ቤተ ክርስቲያን የኢኦተቤ ሳትኾን አትቀርም፡፡ የሚያሳዝነው፣ ዕውቀት የሌለውን ሰው ዕውቀት የሌለው ሰው ሲመራው መጨረሻው አለማማሩ ነው፡፡
እስልምና ዐለም ኹሉ ሊገዛበት ይገባል ብሎ የሚያምንበት የሸሪዐ ሕግ ሰዎችን በእኩልነት አያይም፡፡ በሸሪዐ ሕግ ፊት ሰዎች ኹሉ እኩል አይደሉም፡፡ ሙስሊሞች (በተለይ ደግሞ ሙስሊም ወንዶች) ከኹሉ በላይ ናቸው፡፡ በማኅበረ ቅዱሳን ያልተጻፈ ሕግ (de facto) ፊትም የቤተ ክርስቲያን ልጆች ኹሉ እኩል አይደሉም፡፡ የማኅበረ ቅዱሳን አባላትና ደጋፊዎች ከሌሎች የቤተ ክርስቲያን ልጆች ኹሉ የበላይ ናቸው፤ በኼዱበት ቦታ ኹሉም ቤተ ክርስቲያን ውስጥ ቦታ ሊያገኙና ቤተ ክርስቲያኒቱን በቅኝታቸው ሊያስዘፍኗት ይገባል የሚል አመለካከት ያለው ይመስላል፡፡
ኹለተኛ፣ ሰለፊዎች በሚያቀነቅኑት የሸሪዐ ሕግ መሠረት በዐለም ላይ ሊኖሩ የሚገባቸው ሰዎች እነርሱ፣ እነርሱን የሚደግፉና እነርሱን ባይደግፉም አንገታቸውን ደፍተው ለእነርሱ የሚገብሩ ናቸው፡፡ የዳንኤል ክብረት አባባል እንደሚጠቁመውም ማኅበረ ቅዱሳን በቤተ ክርስቲያን ውስጥ እንዲኖሩ የሚፈልጋቸው የማኅበሩ አባላት፣ ደጋፊዎችና ባይደግፉም አንገታቸውን አቀርቅረው የሚኖሩ በገዛ አባታቸው ቤት ኹለተኛ ዜጎች ኾነው የሚኖሩ ሰዎችን ነው ብል የምሳሳት አይመስለኝም፡፡ ከማኅበሩ ቁጥጥርና ዕውቀት ውጪ የኾነ አንዳችም እንቅስቃሴ በቤተ ክርስቲያን ሲኖር ማኅበሩ በጣም ይፈራል፡፡ ይኽንን ዲ.ን ዳንኤል ክብረት ራሱ ለደጀ ሰላም በጻፋት ታሪካዊ ደብዳቤ በአንድ ወቅት ጠቆም አድርጎን ነበር፡፡ ጥቂት እናስታውስ እሰኪ፡-
ይህ የፍርሃት ድባብ ደግሞ «ቤተ ክርስቲያናችን አንዳች ትሆናለች» ከሚል የመጣ ሳይሆን «ማኅበራችን ይፈርሳል» ከሚል የሚመነጭ ነው፡፡ አመራሩ ማኅበሩ ለቤተ ክርስቲያን የተመሠረተ መሆኑን ዘንግቶታል፡፡ አሁን ቤተ ክርስቲያን ለማኅበሩ ወደሚል አመለካከትም ዞሯል፡፡ ይህ ፍርሃት ማኅበሩ የሚጠበቅበትን ከመሥ ራት ይልቅ ራሱን ለመከላከል ከፍተኛ ወጭ እንዲያወጣ አድርጎታል፡፡ ቤተ ክህነቱ ቢበላሽ፣ ቤተ ክርስቲያን ብትጠፋ፣ ችግሮች እየተባባሱ ቢመጡ እርሱን እስካልነካው ድረስ ዝምታን ይመርጣል፡፡ ዲያቆን በጋሻው ማስተማር የጀመረው መቼ ነው) ማኅበሩ በነዲያቆን በጋሻው ላይ ሃሳብ ዛሬ መሠንዘር ለምን ጀመረ) በጋሻው ለቤተ ክርስቲያን አደጋ ነው ብሎ ስላሰበ አይደለም፡፡ በጋሻው ማኅበረ ቅዱሳንን በተመለከተ ስለ ተናገረ ነው፡፡ ከዚያ በፊት ምንም ያልተናገረው ማኅበር ስሙ ሲነሣ ቤተ ክርስቲያን ተነካች ብሎ ተነሣ፡፡ ማኅበሩ አቡነ ጳውሎስን በተመለከተ የተለየ አቋም መያዝ የጀመረው መቼ ነው) «እር ሳቸው ማኅበሩን ሊያፈርሱ ነው» ብሎ መሥጋት ከጀመረ በኋላ፡፡ አባ ሠረቀንም ቢሆ ንኮ ዛሬ ዛሬ በእምነት ችግር ይከሳቸዋል እንጂ፣ ከእርሳቸው ጋር ያለው ዋናው ችግሩ ማኅበሩ መነካቱ ነው፡፡ አባ ሠረቀ ማኅበረ ቅዱሳንን ሳይነኩ የፈለጉትን ቢሆኑ ኖሮ አይናገራቸውም ነበር፡፡ ባለፈው ጊዜ በቅዱስ ሲኖዶስ ላይ ችግር ሲፈጠር፣ ዝምታን መርጦ የነበረው አመራር የመንግሥት አካላት ከቤተ ክህነቱ ባለሥልጣናት ጋር ሆነው ስለ ማኅበሩ ሲያወያዩት ግን አገር ይያዝልኝ አለ፡፡ የአዋሳ ምእመናንን ችግር በዝምታ ያለፈው አመራር አባ ሠረቀ አንዳች ነገር ተናገሩ ብሎ ድምፁን አሰምቶ ተናገረ፡፡ እነዚህ እና መሰል ሁኔታ ዎች አመራሩ የሚቆረቁረው ማኅበሩ ሲነካ እንጂ ቤተ ክርስቲያኒቱ ስትነካ አለመሆኑን ያመለክታሉ፡፡

ካረን አርምስተሮንግ (Karen Armstrong) የምትባል ጸሐፊት “Battle for God” በተሰኘ መጽሐፏ የአክራሪነት ምንጩ ፍርኀት ነው ትላለች፡፡ ማኅበረ ቅዱሳንም በኼደበት ኹሉ የሚያቀነቅነው ይኽንኑ “እነ እገሌ ሊያጠፉን ነው!”፣ “አውሮጳውያን ቅዱሱን ባህላችንን ሊበርዙብን ነው፡፡”፣ “የምዕራባውያን ተላላኪዎች የኾኑት መናፍቃን ኢትዮጵያን ለቅኝ ግዛት አሳልፈው ሊሰጡን ነው፡፡”፣ ወዘተ. ነው፡፡ እስኪ በቁጣ ሳይኾን በጥሞና ነገሩን አስተውሉትና ማኅበረ ቅዱሳን እውነት ጽንፈኛ ማኅበር አለመኾኑን አስረዱኝ፡፡ ከተሳሳትኹ እታረማለኹ፡፡
Share this article :

+ የተሰጡ አስተያየቶች + 3 የተሰጡ አስተያየቶች

Anonymous
October 15, 2013 at 7:41 AM

በትክክል አይተሃቸዋል። ከእነርሱ በስተቀር ተቆርቋሪ የሌለ ይመስላቸዋል። የሚገርመው ደግሞ እርሱ የሚደግፋቸው ሰዎች ጳጳሳት ሳይቀሩ የሚታወቅ ነውር ያለባቸው ናቸው። ራሱም ቤተ ክርስቲያኒቱ ስር ተጠግቶ የማይነጥፈው ጡቷን የሚመገምግ ጥርሳም ጥጃ ነው። ከማቅ ቤተ ክርስቲያን ያተረፈችው የብዙዎች ኩብለላ: ስለላ: ሁከትና ስም ማጥፋት ነው። እስኪ በማቅ ተሰብኮ ወደቤተ ክርስቲያን የተመለሰ መናፈቅ ወይም የሌላ ሃይማኖት ሰው ጥሩ!!!

Anonymous
October 15, 2013 at 6:22 PM

(ይህ ጽሁፍ በአባ ሰላማ መካነ ድር ላይ አንድ አስተያየት ሰጪ ያቀረበው ሲሆን ስለተሃድሶ ጴንጤ ወቅታዊ ሁኔታ በአጭሩ ይገልፃል።)


በአባቶቻችን ስም የምትነግዱ አባ ሰላማ ተብለህ የተጠራህ አንተም ብትሆን ተሃድሶ ነህ፡፡ ስለ ኦርቶዶክስ መናገር መብትም የለህም፡፡ እንኩዋን ማህበረ ቅዱሳን አንድ ግለሰብ ለኢትዮጵያ ኦርቶዶክስ የመከራከርና በውስጥዋ የሚደረጉ እኩይ ተግባራት መቃወም ይችላል፡፡ መናፍቅ ከሆንክ እራስህን ችለህ እንደ ዘመኑ ፖለቲከኞች እራስህን ችለህ መቁዋቁዋም እንጂ በስምዋ መነገድ ውስጥ ሆኜ የኔን ሃሳብ አንጸባርቃለሁ ማለት አይቻልም፡፡ የመናፍቃን ተሃድሶ ትልቁ ችግራችሁ የቤተክርስቲንዋን መብት አለማወቃችሁ ነው፡፡ ትልቁ ችግራችሁ የዘመኑ ፖለቲከኞችን አስተሳሰብ በመያዝ ማህበሩ ላይ አንድ ላይ ለመውረድ መሞከር ምንም አይመጣም፡፡ እስካሁን በተሃድሶነት የተጠየቁት ሁሉ ወደ ምንፍቅናው እንጂ ወደ ቤተክርስቲያንዋ አስተሳሰብ ሲመጡ አይታይም፡፡ ሳይመከሩም ቀርቶ አይደለም የራሳችንን ብቻ በማለታቸው እንደ ቤተክርስቲንዋ ስላልሄዱ ሊወነጀሉ ሊጠየቁ ይችላል፡፡ ይህ ደግሞ ተጨባጭ መረጃን በማስደገፍ ለሚመለከተው አካል በማስተላለፍ ሲኖዶስ እንዲመለከተው በማድረግ ነው፡፡ ለምን ተወገዙብን ከሆነ አሳማኝ ውንብድና ስለተገኘባቸው ነው፡፡ በየትኛውም ጊዜ ቢሆን ቁርጠኛ የቤተክርስቲያን ልጆች ነበሩ ግን የማህበሩ አባል አይደሉም፡፡ በነዚህ ቁርጠኛ ሰዎች በተወሰደ እርምጃ ወደ ማህበሩ ማጣጋት ተገቢ አይደለም፡፡ በእያንዳደንዱ ሃብት በስተጀርባ አንድ ነገር አለ እንደሚባለው በቤተክርስቲያን የእውነት ተከራካሪዎች ዙሪያ ማህበሩ አለ ማለት አይቻልም፡፡ አሁን ዘመኑ የክህደት ስለሆነ ቤተክርስቲን በጥንቃቄ የምትሄድበት በመሆኑ ልጆችዋም ተጠንቅቀው እንዲሄዱ እያደረገች ያለበት ሁኔታ ነው ያለው፡፡ በአውደምህረት እየሆነ ያለውን ነገር ስለሚታወቅ ለተሃድሶ አትከራከሩ፡፡ ለመሆኑ እናንተ መናፍቃን ለሚሉዋችሁ ነገር ለብር ብላችሁ ትሮጣላችሁ እንጂ ለየትኛው የቤተክርስቲያን ህልውና ቆማችሁ፡፡ የትኛውን ቤተክርስቲያን የውስጥ ችግር ፈቺ ሆናችሁ፡፡ ስንት ቤተክርስቲያን በጡዋፍና በእጣን እጦት አገልግሎታቸው ሲታጎል መች ዞር ብላችሁ አያችሁ፡፡ ገዳማት ሲራቆቱ መች ተናገራችሁ መች ሰው አስተባብራችሁ እረዳችሁ እንደውም የውንብድና ስራን ስትሰሩ ታያችሁ እንጂ፡፡ ገዳም ውስጥ ምን ታደርጉ እንደነበር እናውቃለን፡፡ ለነዚህ ገዳማት ችግር ማህበሩ ሰዎችን አስተባብሮ ማድረጉና እራሳቸውን መቻላቸውን ስታዩ ለመናፍቃን ለናንተ ዝግ ሲሆንባችሁ የሆነውን በጎ ስራ መቃወም ጀመራችሁ፡፡ ሰው ፈቅዶ ለቤተክርስቲያን ብሎ የሚያደርገው ነገር ማንም ግብር ይክፈልበት ብሎ ህግ ያወጣ የለም፡፡ ዞራችሁ ዞራችሁ የመንግስትን ድጋፍ ለማግኘት ስትሉ ከታክስ ጋር ታገናኛላችሁ፡፡ ምንም በሉ ምን አያዋጣችሁም፡፡ ዲያቆን ዳንኤል ክብረት ያነሳቸው ጉዳዮች በሙሉ ትክክለኛ ናቸው ብዬ አምናለሁ፡፡ ለእናንተ ለተሃድሶ መናፍቃን አቡነ ጳውሎስ እንደፈለጋችሁ እንድትሆኑ እድሉን ስለሰጡዋችሁ የእሳቸው ነገር ሲነሳ የእግር እሳት ሆኖ ያቃጥላችሁዋል፡፡ በእሳቸው ሞት ቤተክርስቲንዋ ትልቅ እረፍት አግኘታለች፡፡ የሰሩት ስራ የለም ለማለት ሳይሆን ቤተክርስቲያንዋን እየገነቡ ማፍረስ የሚመስል ስለሆነ ስራቸው መሞታቸው ጠቃሚ ነበር፡፡ ወሮ በላ ነው ያተረፉልን፡፡ ቤተክርስቲንዋን ለበላተኛ ለመናፍቃን ነው አሳልፈው የሰጡት፡፡ አሁን የተሸሙትን አባት ከቆይታቸው አንጻር ብዙ ሰርተዋል ማለት ይቻላል፡፡ ሞኝ የተከለውን ብልህ አይነቅለውም እንደሚባለው 21 ዓመት የተዝረከረከውን በወራት ማስተካከል ባይቻልም በእስካሁን ጥሩ ነው፡፡ መናፍቃን መጠጊያ ስላጣችሁ በሩ ስለተዘጋባችሁ ትቃወሙዋቸዋላችሁ፡፡ ይህ ደግሞ ተገቢ አይደለም ለምን ቢባል እናንተ ኦርቶዶክስ ስላልሆናችሁ የናንተ ቤተክርስቲያን ባልሆነች ላይ አስተያየት መስጠት አትችሉም፡፡ አሁንም አትችሉም፡፡ ስለኦርቶዶክስ ለመናገር ሞራሉም የላችሁም እንላለን፡፡

Anonymous
October 15, 2013 at 9:51 PM

@ ተሀድሶ ማለት ማለት ምን ማለት ነው?
ይህንን የማለቱ ስልጣን የማነው? የማኅበረ ቅዱሳን ድርሻ ምንድነው?

Post a Comment

አስተያየቶች

 
Support : | |
Copyright © 2011. ደጀ ብርሃን dejebirhan - All Rights Reserved

Proudly powered by Blogger