ግዝት(ውግዘት)…ኑፋቄ….መናፍቅነት…ግዝት-ዘበከንቱ… እና ወፈ-ገዝት መሆን!


 ( በአማን ነጸረ )
1. ግዝት(ውግዘት)፡ ማለት አንድ ምዕመን(አማኝ) በአፉ ክርስቲያን ነኝ ቢልም በተግባር ከሃይማኖት ወጥቶ ከበጎ ምግባር አድጦ(ተዛንፎ) ሲገኝ ከማኅበረ ምዕመናን እንዲለይ በስልጣነ-ክህነት የሚፈጸም መንፈሳዊ ቅጣት ነው፡፡
2. የውግዘት ዓላማ፡(ሀ)ቤ/ክ እንዳትረክስ፣(ለ)ኑፋቄው ወደ ሌሎች እንዳይዛመት፣(ሐ)ተወጋዡ በንስሐ እንዲመለስ እድል ለመስጠት ነው፡፡
3. የውግዘት ቅድመ-ሁኔታዎች፡(ሀ)ተጠርጣሪው ከሃይማኖት እና/ወይም ከበጎ ምግባር መውጣቱን ማረጋገጥ፣(ለ)ከጥፋቱ/ከክህደቱ እንዲመለስ ደጋግሞ መገሰጽና መምከር፣(ሐ)ተመክሮ ካልተመለሰ በስልጣነ-ክህነት አውግዞ መለየት፣(4)ውግዘቱ እንደጥሰቱ ዓይነት ከማዕረግ ዝቅ ማድረግ ወይም ስመ-ክርስትናን ነጥቆ መለየት ሊሆን ይችላል፡፡ከዚህ በኋላ ድርጊቱ-ኑፋቄ ተወጋዡም-መናፍቅ ይባላሉ፡፡በነገራችን ላይ ምንፍቅና የሚል ቃል በየመጻህፍቱ አላየንም፡፡በግእዙ ኑፋቄ ነው የሚባለው፡፡በአማርኛ መናፍቅነት፡፡
4. ግዝት-ዘበከንቱ እና ወፈ-ገዝት መሆን፡ ከላይ ያሉትን ቅድመ ሁኔታዎች ያላሟላ ግዝት ግዝት-ዘበከንቱ ሲባል ገዛቹም ወፈ-ገዝት ይባላል፡፡ነገር ግን ተጠርጣሪው በግልጽ የተወገዘ ሃይማኖትንና ምግባርን ሲያራምድ ያገኘነው እንደሆነ መናፍቅ ብንለው ፍርድ የለብንም፡፡
5. ከንቱ እና ከንቱ አንድ ወገን ብለን ስለመርገም ዘበከንቱም እንናገር፡ ሀቅ ላይ ያልተመሰረተና የሚረገመውን ሰው ህሊና የመውቀስ አቅም የሌለው ከንቱ እርግማን በመጽሐፈ ምሳሌ 26 ቁ 2 እንደተገለጸው….እንደሚተላለፍ ድንቢጥ፣ወዲያና ወዲህም እንደሚበር ጨረባ እንዲሁም ከንቱ እርግማን በማንም ላይ አይደርስም፡፡ፍትሐ ነገስቱም በአንቀጽ 11 እንዲህ አይነቱን ረጋሚ “ወኩሎ ዘይረግም ይረግም ነፍሶ” ይለዋል::
ምንጭ፡ (1) መርሐጽድቅ ባህለ ሃይማኖት በ1988 ዓ.ም በትንሳኤ ዘጉባኤ ማተሚያ ቤት የታተመ ገጽ 157 እስከ 161 ፣ (2)የመጽሐፍ ቅዱስ መዝገበ ቃላት ገጽ-237፣ (3) ጥቅሶች፡ ማቴ 18 ቁ 15-18፣2ተሰ 3ቁ14፣ቲቶ 3 ቁ 11፣1ጢሞ 1ቁ 19፣2ጢሞ 2 ቁ 17፣1ቆሮ 5 ቁ 5፣2ቆሮ 2 ቁ 6
መነሻ፡ በ40 ቀን ያገኘነውን ኦርቶዶክሳዊ ክርስትና ባልተሰጠ ስልጣነ-ክህነት ሊነጥቁ የሚሞክሩ ወፈ-ገዝት ወንድሞቻችን!!
Share this article :

+ የተሰጡ አስተያየቶች + 5 የተሰጡ አስተያየቶች

Anonymous
May 25, 2014 at 10:41 PM

“በ40 ቀን ያገኘነውን ኦርቶዶክሳዊ ክርስትና ባልተሰጠ ስልጣነ-ክህነት ሊነጥቁ የሚሞክሩ ወፈ-ገዝት ወንድሞቻችን!!"
አይ ያንተ ነገር ዛሬ ደሞ ክርስትናህ በ40 ቀን የተሰጠህ ሆኖ ቁጭ አለ? የቤተ ክህነቱ የሙስና ንጉስ በአማን እንዳለው "ነገር ግን ተጠርጣሪው በግልጽ የተወገዘ ሃይማኖትንና ምግባርን ሲያራምድ ያገኘነው እንደሆነ መናፍቅ ብንለው ፍርድ የለብንም፡፡" ስለዚህ አንተ የጴንጤዎችን ምንፍቅና እስካራመድክ ድረስ መናፍቅ መባልህ አስገራሚ አይደለም።

Anonymous
June 9, 2014 at 9:36 AM

ወይ አማን ነፀረ ላካ ምንጭህ እዚህ ነው… እንደ እናንተ አይነቱ ከሃዲ ለቤተክርስቲን አሳቢ መስሎ መምጣቱ የትም አያደርስም… ተሃድሶዎች

በአማን ነጸረ
June 17, 2014 at 10:22 AM

ውድ የደጀብርሃን አዘጋጅ፡ በዓላማህ እና በዘወትር አካሄድህ ባልስማማም እውነት ከልብህ አምነህበት ከሆነ ያወጣኸው የኔን ሚጢጢ ጽሁፍ በማውጣትህ አልከፋም፡፡ከማውጣትህ በፊት ፈቃደኝነቴን ብትጠይቅ ግን ደስ ይለኝ ነበር፡፡አንዳንድ የማኅበረቅዱሳንን አካሄዶች ስለምተች የእኛ ሰው(ተሃድሶ) ነው ብለህ እንደማትገምተኝም ተስፋ አለኝ!!
ከላይ ያላችሁት አስተያየት ሰጪዎች፡
(1) ከጽሁፉ ይዘት ይልቅ የወጣበትን ብሎግ በመመልከት ብቻ ያውም ጽሁፉ በእኔ ፈቃድ ይሁን ወይም ያለፈቃዴ ከፌስቡክ ገጼ ተወስዶ የተለጠፈው ሳታጣሩ እኔ ላይ የኖረ ቂም ያላችሁ በሚመስል መልኩ አትንደቅደቁ!!
(2) ከበረታችሁ ጽሁፉ ኦርቶዶክሳዊ ነው/አይደለም የሚለውን መርምሩ፡፡ቢያንስ ተሃድሶዎች ስልጣነ-ክህነትን እንደማይቀበሉ እና በጸጋው ድነናል ብለው ስለሚያስቡ ምግባር ለመዳን አስፈላጊ እንዳልሆነ መስበካቸውን አስባችሁ ከዚህ አቋማቸው የሚቃረነውን ስለግዝት የተጻፈ ጽሁፍ ኦርቶዶክሳዊነት ብትመሰክሩ መልካም ነበር፡፡ካልሆነም ዝም ብትሉ!!
(3) እናንተ ግን ይህን ለማድረግ የሚያስችል ምግባር አልፈጠረባችሁም፡፡ቲፎዞ ናችኋ!!አብሮ ያልቶፈዘውን ሁሉ ማተቡን አስበጥሶ ባልተሰጠ ስልጣን ለማባረር መሞከርን በየቲፎዞው ሚዲያ ለምደነዋልና አይገርመንም!!ስለዚህ በፍረጃ የተሞላውን ከንቱ እርግማናችሁን …ወኩሎ ዘይረግም ይረግም ነፍሶ… ብየ አልፋችኋለሁ፡፡ላለአዋቂ ሳሚ የቲፎዞ ጫጫታ ጊዜ የለንም!!
(4) ኦርቶዶክስነታችሁን በጫጫታ ሳይሆን በሰከነ ኦርቶዶክሳዊ ስነ-ምግባር አጅባችሁ ስትኖሩበት እንነጋገራለን!!ሞዴል የሚሆን የአባላት የሚዲያ አጠቃቀም ስነ-ምግባር ደንብ ቢቀመጥ እያልን የምንጮኸው እንደ እናንተ አይነት ጠቦቶች ኦርቶዶክሳዊቷን ቤ/ክ አቀፍናት ብለው እንዳያፍኗት ነው!!እናም ዝርዋንን የመታገል ጉዟችን ባለቤቱ እስከፈቀደ እና ቀልብ እስክትገዙ ድረስ ይቀጥላል!!
(5) ውስጣዊውን ትግል የጭንቅ ቦታ ላይ ስትደርሱ እኛን የማይነካካንን ተሃድሶ የምትል ማሸማቀቂያ በመፍጠር ከኑግ ጋር እንደተገኘ ሰሊጥ ልትወቅጡን ባትሞክሩ ጥሩ ነው!!ስታይሉ ስለተነቃበት!!ካስተዋላችሁ የዳንኤል ክብረት ጽሁፍም ፈቃደኝነቱ ሳይጠየቅ አባሰላማ ብሎግ ላይ ተለጥፎ ይሄው የብሎጉ ማናበቢያ ሆኖ ይኖራል!!እነ ሞኞ! ታዲያ ዳንኤል ክብረት ጽሁፍ በሳላማ ብሎግ ወጣ ማለት ዳኒ ተሃድሶ ሆነ ብላችሁ ተርጉማችሁት ይሆን!!አይይይ….!!

June 18, 2014 at 7:49 PM

ውድ በአማን ነጸረ፤
ጽሁፍህን በማውጣታችን የተሰማህን አስተያየት ስለገለጽክልን እናመሰግናለን። የጽሁፉ ባለቤት የመካነ ጦማሩ ባለመሆኑ ስም ጠቅሰናል። ጽሁፉን ያወጣነው
1/ ቤተክርስቲያን አውግዘናቸዋል የምትለውን አንዳንድ የውግዘቶች መነሾና ሂደት በተመለከተ እጥር ምጥን ባለ ገለጻ ስላስቀመጥከው ያንን ለመመዘን እንዲቻል ከማሰብ ነው።/ አቡነ መርቆሬዎስ አባ ዘሊባኖስ ተብለው መወገዛቸውንና አቡነ ጳውሎስም አባ ገብረመድኅን ተብለው ከሌሎች ጭምር መወጋገዛቸውን አትዘነጋውም የሚል ተስፋ አለን/ ያንን እንድንመለከትበት የተወሰነ ግንዛቤ ይሰጠናልና አንደኛውም መስፈርት ይህ ነው።
2/ በፌስ ቡክ ላይ ያወጣኸው ለጌጥ ወይም ለተወሰነ ክፍል ንባብ ብለህ እንዳልሆነ እርግጠኛ ነን። የሚታነጽ እንዲቀበለው፤ ያላወቀም እንዲማረው ይመስለናል። ያንን ያንተን ስራ ተቀብለን ተማርንበት፤ እኛም አሰፋነው። ሌሎች እንዳያውቁት ወይም በምንጭነት እንዳይጠቀሙት ከፈለግህ አለመጻፉ ይመረጣል። አለበለዚያም በፌስ ቡክ የክፍያ ገጽ ተመዝግበህ የግል የቅጂ መብትህን ማስከበር ትችላለህ።
3/ ክህነት ማለት አገልግሎት ፤ ካህን ማለትም አገልጋይ ማለት እንደሆነ ይጠፋሃል ብለን አንገምትም። ሕጉ ሲለወጥ ክህነቱ ደግሞ ሊለወጥ ግድ ነው። የቀድሞው የክህነት ህግ ያለመሐላ ከአንድ የሌዊ ዘር በመወለድ ብቻ ይሰጣል። የአዲስ ኪዳኑ ካህን በመሐላ የተሾመ፤ ክህነቱ የማይለወጥ ዘላለማዊ ነው። ዕብ 5፤6, ዕብ 7፤11, ዕብ 7፤20-21,
የአዲስ ኪዳኑ ሊቀካህን በበጎች ደም ሳይሆን በራሱ ደም ሰማያዊቷ መቅደስ ገባ። እዚያ መግባት የሚቻለው በሊቀ ካህኑ መስዋዕት ነው።
«እናንተ ደግሞ እንደ ሕያዋን ድንጋዮች ሆናችሁ፥ በኢየሱስ ክርስቶስ ለእግዚአብሔር ደስ የሚያሰኝ መንፈሳዊ መሥዋዕትን ታቀርቡ ዘንድ ቅዱሳን ካህናት እንድትሆኑ መንፈሳዊ ቤት ለመሆን ተሠሩ» 1ኛ ጴጥ 2፤5
«መንግሥትም ለአምላኩና ለአባቱም ካህናት እንድንሆን ላደረገ፥ ለእርሱ ከዘላለም እስከ ዘላለም ድረስ ክብርና ኃይል ይሁን፤ አሜን» ራእ1፤6 ከወገንና ከጎሳ፤ ከነገድና ከዘር ለይቶ ለተወሰነ ክፍል ይሸነሽን የነበረውን አገልግሎት ክርስቶስ በእሱ ሊቀካህንነት ያመኑትንና የተከተሉትን ሁሉ ካህናት አደረጋቸው።
ባንግባባም የወንጌሉ እውነት ይህ ነው።

Anonymous
June 19, 2014 at 1:11 AM

ሙሰኛውና ተሃድሶው ሊባሉ ነው:: ተሃድሶውማ መስረቅ ልማዱ ነው:: የሞሳኙ እኔ ያላቦካሁት አስገራሚ ነው እንጂ::

Post a Comment

አስተያየቶች

 
Support : | |
Copyright © 2011. ደጀ ብርሃን dejebirhan - All Rights Reserved

Proudly powered by Blogger