የፓትርያርክ ጥቆማው ስልታዊ ነበር፤ የመጨረሻው ምርጫም የማቅ ጥበብ የተሞላበት ይሆን ይሆናል!?

የፓትርያርክ ምርጫው ዘመቻ እየገፋ ሲመጣ የማቅ ስውር ብሎጎችና በስሙ የሚጠራው ድረ ገጽ ጭምር የሚያወጧቸው ዘገባዎች የተጠኑና መጠናቸውም የቀነሰ ሆኗል። «እርቅ ይቅደም፤ ሲኖዶሱ አንድ ይሁን» የሚለውንም ጩኸት በልክ አድርገውታል። በወቅቱ ይህንን ድምጽ ማስጮህ ያስፈለገበት ምክንያት  ማኅበረ ቅዱሳን በፓትርያርክ ምርጫው ውስጥ  እንደሌለበት አንድ እጁን በማሳየት በአንድ እጁ ደግሞ ወደ ምርጫው  ለመግባት የመሸጋገሪያ ስልት አድርጎ በመጠቀም ነበር።  ይህንንም በአንድ በኩል አባላቶቹን በአስመራጭነት ሰግስጎ በመክተት በሌላ መልኩ ደግሞ የፓትርያርክ ምርጫውን እንደሚቃወም መስሎ የመታየት ስልቱ አስቀድሞ ጥናት የተወሰደበት ስልት ነው። ይህ ስልት ደግሞ በትክክል ሰርቷል። ምርጫውን እንቃወማለን ብሎ በመጮህ ብዙዎችን አጃጅሏል ፤ በጀርባው ደግሞ አባላቶቹንም በአስመራጭነት በመሰየም የተሳካ ስራ ሰርቷል። አሁን የቀረው ነገር የሚፈልገውን እጩ በመጠቆም፤ በካርድ ምርጫው ሽፋን የሚፈልገውን ፓትርያርክ አድርጎ ማስቀመጥ ነው። ይህንንም ስልት በተጠና መንገድ እያስኬደው እንደሚገኝ መረጃዎችና እንቅስቃሴዎች ይጠቁሙናል።

 ከአስመራጭ ኮሚቴዎች ውስጥ የአንበሳውን ድርሻ የወሰደው ማቅ ነው።

1. ባያብል ሙላቴ የተባለው ሰው ዊኪሊክስ ሳይቀር የመሰከረለት የማኅበረ ቅዱሳን አባልና በሁለቱ ሲኖዶሶች መካከል እርቅ መምጣት እንደማይችል  በአዲስ አበባ የአሜሪካ ኤምባሲ መረጃ ሲያቀብል የኖረና ቀንደኛ የአባ ጳውሎስ ተቃዋሚ ነው። በወቅቱ አባ ሳሙኤል ከሟቹ ፓትርያርክ ጋር ውዝግብ ውስጥ ስለገቡ ብቻ ደጋፊያቸው መስሎ በመቅረብ እሳት ሲያነድ የቆየ አስመሳይ ሲሆን ዛሬም አባ ሳሙኤል እንደሚመረጡ በማስመሰል እያጃጃለ ቁማሩን ይቆምራል 
2.   ፋንታሁን ሙጬ፤ ይህ ሰው ከኦስትሪያ  ካቶሊክ ኮሌጅ ከተባረረ በኋላ / የመባረሩ ምክንያት ሰፊ ነው/ በአዲስ አበባ ሀገረ ስብከት ሥራ አስኪያጅ ሆኖ የተሾመ ሲሆን የአዲስ አበባ ሀ/ስብከት ካህናትን  በጉቦና በዘረኝነት በሽታ ሥጋቸውን  ጨርሶ አጥንታቸውን እየጋጠ ባለበት ሰዓት ፈጀን፤ ጨረሰን ብለው እሪ በማለታቸው ከቦታው የተነሳ ርኅራኄ ያልፈጠረበት ሰው ነው።  ከአባ ጳውሎስ ጋር ጥብቅ ወዳጅነት የነበረው ሲሆን ከባል አልቦዋ ሴት ጋር ትስስሩ የጠነከረ፤ ማኅበረ ቅዱሳንን በስልት የሚመለከት መሰሪ ሰው ነው።  
3.    ዓለማየሁ ተስፋዬ፤ ይህ ሰው ተንኮለኛና እንቅስቃሴውን እንደቀንድ አውጣ ከሰንኮፉ ሳያርቅ ብቅ ጥልቅ እያደረገ የሚንቀሳቀስ ሲሆን በቦሌ መድኃኔ ዓለም ቤተ ክርስቲያን ብዙ ሚና የተጫወተ አደገኛ ጸረ ትግሬ ነው። «ቃሌ» በሚባለውና በብርቱኳን ሚደቅሳ ስም በተመሠረተው  የፓልቶክ  ውስጥ ተባባሪ ባለቤት /Admin/ ሆኖ የሚያገለግል የሽማግሌ ውሸታም ነው። የኢየሩሳሌም መታሰቢያ ድርጅትን ጥሩ አድርጎ የጋጠ አድመኛና ዘረኛ  እንደሆነም በሰውየው የተማረሩ ሰዎች እንባ ቀረሽ እሮሮ ያሰማሉ።
4. ጸባቴ ገብረ መስቀል ውቤ /ሙሽራው ይሉታል በቅርብ የሚያውቁት/  መልአከ ሰላም ዓምደ ብርሃን ገ/ጻድቅና ዲ/ን ኄኖክ ዐሥራት የማኅበረ ቅዱሳን ደጋፊ ስለመሆናቸው ጥርጣሬ እንደሌላቸው በቅርብ የሚያውቋቸው ይናገራሉ። /በእነዚህ ሰዎች ዙሪያ ያገኘናቸውን ተጨማሪ መረጃዎችን ለማረጋገጥ እየሰራን ነው/

“ቤተ ክርስቲያን አልተከፈለችም”

..... በሚለው የፕ/ ጌታቸው ኃይሌ  መጣጥፍ መነሻነት የተዘጋጀ….
                                  ከመልዐከ ብሥራት፣ ቨርጂኒያ፣
በቅድሚያ ልባዊ ምሥጋናዬና አክብሮቴ ይድረሳቸው፡፡ በዚህ ጽሑፌ የምናገረው በእውነት ለቤተ ክርስቲያን ለሚጨነቁ ምዕመናንና አገልጋዮች ብቻ ነው፡፡ ቤተ ክርስቲያናችን ላለፉት ሃያ አንድ ዓመታት በታላቅ ፈተና ውስጥ አልፋለች፡፡ አሁንም እያለፈች ነው፡፡ እግዚአብሔር አይበለውና ምናልባት የከፋው ፈተና ያለው ከፊት ለፊታችን ሳይሆን አይቀርም፡፡ የዚህም ሰበቡ ችግሮቻችንን በቅጡ ካለመረዳታችንና ከቸልተኝነታችን የመጣ መሆኑ አያጠራጥርም፡፡ ለመሆኑ የቤተ ክርስቲያናችን ችግሮች በተለይ በውጪው ዓለም ምንና ምን ናቸው? ችግሮቹአንድ በአንድ ማወቅ ያስፈልገናል፡፡ ስለዚህ ነገሮችን በጥሞናና በሰከነ ሁኔታ እንድንመረመር ወቅቱ ያስገድደናል፡፡ በአገራችን ያለው የፖለቲካ ሁኔታ መክፋት በቤተ ክርስቲያን ላይ የፈጠረው መከራ እንዳለ ማንም ይረዳዋል፡፡ ይሁንና ግርግር ለሌባ ይመቻልና የፖለቲካው መክፋት መልካም ሁኔታ የፈጠረላቸውና ችግራችን እንዲወሳሰብ ያደረጉ ክፍሎች ካሉም ችግሮቻችንን ከመንስዔው ጀምሮ በጥንቃቄ መመርመር የብልህ አካሄድ ይሆናል፡፡
የጦር መሣሪያ የሚፈበርኩ አገሮች በዓለም ላይ ጦርነት ባይኖር ኖሮ ከስረው ይዘጉ ነበር፡፡ የዓለማችን ፖለቲካ አካሄድ እንደሚያስተምረን ከሆነ ደግሞ መሣሪያ ሻጮቹ ገበያውን ሆነ ብለው እንደሚፈጥሩት ማስረጃ መጥቀስ አያሻም፡፡ አቶ ስዬ አብርሃ በአንድ ወቅት ‹‹ኢህአዴግ ጦርነትን መሥራትም ይችላል›› ሲሉ እንደተናገሩት የውስጥ ችግሮቻችንን ሆነ ብለው የሚሠሩ ብሎም የሚያባብሱ፣ ግርግሩ ገበያ ያደራላቸው አካላት መኖራውን መረዳት ያስፈልጋል፡፡ በአጭሩ ለመናገር ዋናውና ልናስወግደው የሚገባን ችግር አለ ሁላችንም እንስማማበታለን፡፡ ነገር ግን ዋናውን ችግር በሕብረት ሆነን እንዳንመክት ጎዳናውን የሚያወሳስቡ ሌሎች በቅድሚያ ልናስወግዳቸው የሚገቡንን ተጨማሪ ችግሮችም አሉን፡፡ አነዚያን በቅድሚያ ማስወገድ ያስፈልገናል፡፡ ከውጪ ያለብንን ጠላት ከውስጥ አንድ ሳንሆን እንጋፈጠው ብንል ውጤቱ የታወቀ ስለሆነ በፊት የውስጡን ችግር እናስወግድ፡፡ የውጪውን ለመቋም የተሸለ ዝግጅት የሚኖረን ያን ጊዜ ነው፡፡ በዚህ ከተስማማን ወደፊት እንቀጥልና የቤተ ክርስቲያናችንን ችግሮች በቅድሚያ እንደ ጌታቸው ኃይሌ በድፍረት አንጠቁማቸው፡፡ ከዚያም በግልጽ እንወያይባቸው፡፡ ያለዚያ ለውስጥ ደዌአችን ማርከሻ መድኃኒት ሳንወስድ በሥልጣን ላይ ያለውን አስከፊ አገዛዝ ለመቃወምና እርሱን ለማጥቃት ብቻ ብለን የወያኔን ኃጢአቶች ብቻ መላልሰን ብንናገራቸው "ውሃን እንቦጭ" ከማድረግ የዘለለ የምናገኘው ጥቅም አይኖርም፡፡ ስለዚህ ወደ ውስጣችንም የመመልከት ድፍረቱ እንዲኖረን እውነታው ያሳስበናል፡፡ በቅድሚያ ራሳችንንእንመርምር!!! በተጨማሪም ዛሬ ያልተዳሰሰው ችግራችን ነገ ያልተጠበቀ ክፉ ችግር (ካንሠር) ማስከተሉ አይቀርም፡፡ ወደድንም ጠላንም በእስከዛሬው ቸልተኝነታችን የተነሣም አንዳነድ የካንሠሩ ምልክቶችም ችግራችን በተንሠራፋባቸው በተለያዩ የዓለም ክፍሎች መታየት ጀምረዋል፡፡ እርሱን እመለስበታለሁ፡፡
 በአሁኑ ጊዜ ጎልተው ለሚታዩት የቤተ ክርስቲያናችን ችግሮች ምንጩ ወያኔ ብቻ ነው ብሎ ማመን ፍፁም የዋህነት ነው፡፡ ጌታቸው ኃይሌ ነካክተውታል፡፡ ይሁን እንጂ ታሪካዊ ስሕተት የፈጸሙት ወያኔዎች ብቻ ሳይሆኑ የውጪ ሲኖዶስ አቋቋመናል ያሉት አምስቱ ጳጳሳት ጭምር ናቸው፡፡ የስደት ሲኖዶስ ማቋቋም ትክክልና ሕጋዊነት እንደሌለው እያወቁ "ውሻ በቀደደው ዥብ ይገባል" እንዲሉ ነገ በቤተ ክርስቲያን ላይ ሊያስከትል የሚችለውን አደጋ እንዳያስተውሉ የሥልጣን ጉጉት ዓይናቸውን ጋርዶት ወያኔ በቤተ ክርስቲያን ላይ ካደረሰባት በደል የሚከፋውን በደል የፈጸሙት እነሱ ናቸው፡፡ እነዚህ ሰዎች ብልሆችና ለቤተ ክርስቲያንና ለቀጣዩ ቅውልድ አርቆ አሳቢዎች ቢሆኑ ኖሮ የጀመሩት ጉዞ ለማንም እንደማይበጅ ተገንዝበው "ወንበሩ ለኛ ይገባል" የሚል መንቻካ ግትርነታቸውን ትተው "የከፋፍለህ ግዛ" አጀንዳን አንግቦ የመጣውን ወያኔን ሕዝቡን አንድ በማድረግ በልጠውት በተገኙ ነበር፡፡ ነገር ግን እልህ የተሞላው የሞኝ ጉዞአቸውና ገታራነታቸው ሳያውቁት የራሱ የወያኔ ዓላማ ተባባሪ አድርጓቸው አረፈ፡፡ አንድ ጥላ ሥር መሰብሰብ የነበረበትን የአንድ ቤተ ክርስቲያን ምዕመን ለሥልጣን ጥማቸው ሲሉ ከፋፈሉት፡፡ የታደለ ወያኔ በቤተ ክርስቲያን ውስጥ መሥራት የነበረበትን የመከፋፈልና የመበጥበጥ አጀንዳውን በብዙ ፐርሰንት አቀለሉለት፤ እናም ደጋግመው ሳያስቡበት፣ እኔ ከሞትኩ ሠርዶ አይብቀል እንዳለችው እንስሳ በራስ ወዳድነት ያቋቋሙት "ሲኖዶስ" ምዕመኑን ከመከፋፈልና ከማወናበድ እነዲሁም ለግለሰቦች መጠቀሚያ ከመሆን የዘለለ ሃያ አንድ ዓመት ባስቆጠረው ዕድሜው ለቤተ ክርስቲያንና ለበጎቿ ያስገኘው አንዳችም ፋይዳ የለም፡፡
ሰዎች ብዙ ጊዜ፣ አሁን ጌታቸው በጽሑፋቸው እንደጠቀሱት ስለጎሰኝነት የሚያነሱት ነገር አለ፡፡ ስለ ጎሰኝነት ሲወሳ አንድ ነገር በድፍረት ልናነሣ የግድ ነው፡፡ ጣትን ወደ ወያኔ አቅጣጫ ብቻ መጠቆም አግባብም ሞራላዊም አይደለም፡፡ ሌባን "ሌባ!!" ብለን በድፍረት ስንሰድብ እኛ ሌቦች መሆን የለብንም፡፡ ያለበለዚያ ሌባው እየሳቀ "አመድ በዱቄት ይስቃል" በማለት በራሳችን ላይ ማላገጡ የማይቀር ነው፡፡ እና ሁል ጊዜ በጎሰኝነት የምንከሰው ወያኔን ብቻ ነው፡፡ ምክንያታችንም ወያኔ ከአንድ ጎሣ (ከትግራይ) የወጣ፣ በደደቢት የተጠነሰሰ ጠባብ የጎጠኞች ቡድን በመሆኑ ነው፡፡ ሲጠነሰስም በስምንት ሰዎች ነበር፡፡ እነዚህስ አምስቱ ሲኖዶስ አቋቋሚዎች፤ ነፍሳቸውን ይማረውና አቡነ ዜና ማርቆስ፣ አቡነ መልከፀዴቅ፣ አቡነ ኤልያስ፣ አቡነ ጎርጎርዮስ፣ (አቡነ ይሥሐቅ በፊት ተሳስተው አብረዋቸው የነበሩ ቢሆንም ኋላ ግን ነገሩ ሲገባቸው ተለይተዋል) እንዲሁም የቀድሞው ፓትርያርክ ራሳቸው ብፁዕ ወቅዱስ አቡነ መርቆሬዎስ፤ የነርሱ ሁኔታስ በምን መነጽር ነው የሚታየው? እነዚህምኮ የመጡት ከአንድ ክፍለ ሐገር ነው፡፡ እንዲያውም ምንጫቸው ከአንድ አውራጃ ነው፡፡ ጎሰኝነት በኛ ላይ ሲሆን ጌጥ፣ በወያኔ ላይ ሲሆን ግን የሚያስጠላ፣ የሚዘገንን ቁስል የሚሆነው እስከመቼ ነው? ያለው ሰው ትዝ አይለኝም፡፡ ስለዚህ እነዚህም ያው ጎሰኞች ናቸው፡፡ አሁንም ቢሆን ስደተኛ በሚሉት ሲኖዶስ ውስጥ በቅርቡ ከተሸሙት 13 ጳጳሳት ውስጥ ለመልክ ከተቀየጡት የሌላ ጎሣ አባላት በስተቀር ሁሉም ለማለት ይቻላል ያው የአንድ አካባቢ ሰዎች ናቸው፡፡ ዝርዝራቸውን ማውጣት ይቻላል፡፡ ወያኔ የጎሰኝነት መልኩን ለመቀየር (ለማጭበርበር) ራሱ ጠፍጥፎ በሠራው ኢህአዴግ በተሰኘ ጭምብሉ፤ እነዚህም ሕጋዊው ሲኖዶስ እያሉ በሚጠሩት ጭምብላቸው ውስጥ እየተሸሸጉ ነው የግል ፕሮግራሞቻቸውን የሚያከናውኑት፡፡ ቢዋጥልንም ባይዋጥልንም ሐቁ ይኸው ነው፡፡ ይህን ችግር ዛሬ በለጋነቱ አፍረጥርጠን እንዲስተካከል ካላደረግነው ነገ ከማይስተካከልበት ደረጃ ላይ ከደረሰ በኋላ ሌላ ችግር ሲፈጥር ሁላችንም ቢያንስ በሕሊና ዳኝነት ተጠያቂ መሆናችን አይቀርም፡፡ "አይ ሠላም፣ በስምሽ ስንት ግፍ ተሠራ" እንደተባለው በዳያስፖራው ማኅበረሰብ ውስጥ በኢትዮጵያና (በጋራ ጠለታችን በወያኔ) ስም በቤተ ክርስቲያን ላይ ስንት ዓይነት ጥፋት ደረሰ !!! እና ትግሬም ይሁን አማራ፣ ኦሮሞም ይሁን ጉራጌ ጠባብ አስተሳሰብ አራማጅ ከሆነ ጎሰናና ጎጠኛ ነው፡፡ ስለዚህ በወያኔ የተኮነነ ጣልቃ ገብነት ላይ ተቃውሞዬ እንደተጠበቀ ሆኖ ነገር ግን የነዚህ ሊቃነ ጳጳሳት በስማችን እየነገዱ አላስፈላጊ የሆነ ሲኖዶስ ማቋቋማቸው ከኩነኔም ኩነኔ እርሱ ነው፡፡ ይህ ድርጊታቸው በወያኔ ተነጠቅን በሚሉት ሥልጣን በኩርፊያ ተነሳስተው በግል ደረጃ ያደረጉት የሞት ሽረት ትንንቅ እንጂ ለቤተ ክርስቲያን ሕልውና አስፈላጊ ስለሆነ የወሰዱት ርምጃ አለመሆኑ በሁላችንም ዘንድ በደንብ መታወቅ አለበት፡፡ ይህም እውነታ ባለፉት የሃያ አንድ የመከራ ዓመታት ውስጥ ሲኖዶሱ አንድም ጥቅም አለመስጠቱን በሚገባ አረጋግጦልናል፡፡ ከነሱ ጦሰኛ ሲኖዶስ መመሥረት ለቤተ ክርስቲያን የተረፋት ነገር ቢኖር ዋናውን የጋራ ጠላት አስቀምጦ እርስ በርስ መከፋፈል፣ የወንድማማቾች ጠብና ክርክር፣ ስድድብና መወጋገዝ ብቻ ነው፡፡ አጋጣሚው በከፈተላቸው ዕድልም የሃይማኖት ተቃማዊዎቻችን በጥሩ ሁኔታ እንደተጠቀሙብን ሌላው የማንክደው ሐቅ ነው፡፡ ጌታቸው ኃይሌ ከተናገሩት ውስጥ "በሀገሪቱ ላይ የዘሩትን ጎሰኝነት ዘረኝነት ከማታውቀው ቤተ ክርስቲያን አስገቡት" ሲሉ ያስቀመጡት አባባል ሐቀኝነቱ እንዳለ ሆኖ ነገር ግን ለዚህ ችግርም መከሰት ተጠያቂው ጎሰኛው የወያኔ መንግሥት ብቻ አለመሆኑን በቅጡ መመልከት ያስፈልጋል፡፡ ይህን ለመመልከት እስቲ ከወያኔ መምጣት በፊት የነበረውን የቤተ ክርስቲያን አስተዳደር ለአንድ አፍታ ወደ ኋላ ተመልሰን እንዳስሰው፡፡ የቀድሞው ፓትሪያርክ ብፁዕ ወቅዱስ አቡነ መርቆሬዎስ በሥልጣን ላይ የቆዩበትን ጊዜ ማለቴ ነው፡፡ በነገራችን ላይ ወያኔ ያደረገውን የቤተ ክርስቲያን ጣልቃ ገብነት ደርግም ሲፈጽመው የቆየ ባሕል መሆኑን ልብ ማለት የስፈልጋል፡፡ ብዙ ሰዎች ይህ ዓይነቱ ተግባር የወያኔ ብቻ ይመስላቸዋል፡፡ ንጉሠ ነገሥቱ በቀጥታ፣ ደርግ ደግሞ እንደ ወያኔ በሥውር በቤተ ክርስቲያኒቱ አስተዳደር ጣልቃ ይገቡ ነበር፡፡
ወያኔዎች ልክ አቡነ ጳውሎስን በመንበሩ ላይ በጉልበት እንደሰየሙ ሁሉ አቡነ መርቆሬዎስንም በሥልጣን እንዲቀመጡ ያደረጉት ደርጎች ነበሩ፡፡ እንዲያውም ለሹመት ያቀረባቸው (ኢንዶርስ ያደረጋቸው) በወቅቱ የጎንደር ፈላጭ ቆራጭ የነበረው የመንግሥቱ ቀኝ እጅ መላኩ ተፈራ እንደነበር ይታወቃል፡፡ ከአቡነ መርቆሬዎስ በፊት የነበሩት ፓትሪያርክ ብፁዕ ወቅዱስ አቡነ ተ/ሃይማኖት ባረፉ ጊዜ ይነገር የነበረ አንድ ቀልድ ነበር፡፡ ደርጎቹ መንበረ ሥላጣኑን የሚሰጡት ታማኝ መነኩሴ  (ጳጳስ) ሲያፈላልጉ በነበረ ጊዜ መንግሥቱ ኃ/ማርያም ተናገረ የተባለው ቀልድ ነው ቀልዱ፡፡ "እገሌ አይሆንም ጠማማ ነው" "እገሌ መሐይም ነው" "እገሌም እንዲህ ነው" ወዘተ.. እየተባለ ከጳጳስ ጳጳስ ሲመረጥ በነበረ ጊዜ "ታማኝ" ጳጳስ ፍለጋው ጊዜ ስለወሰደ ነው አሉ፤ አጅሬ "በቃ እንግዲህ እንደፈረደብኝ እኔው ደርቤ እሰራዋለሁ" አለ ይባላል… ፓትሪያርክነቱን….. ወደ ርዕሰ ጉዳዩ እንመለስና በየወቅቱ የነበሩ የኢትዮጵያ መንግሥታት ቤተ ክርስቲያንን መቆጣጠራቸው የታወቀ ልምምድ ሲሆን እንኳን ወያኔ በጉልበቱ (በአፈ ሙዝ) በሥልጣን ኮርቻ ላይ የተወዘፈው መንግሥት ይቅርና ሌላውም ቢሆን ቤተ ክርስቲያንን መቆጣጠር ግድ የሚሆንበት ምክንያት ቤተ ክርስቲያንን እንደ ልቧ ለቅቆ እንደ መንግሥት መቆም እንደማይችል ስለሚታወቅ ነው፡፡

ኢትዮጵያን የእስልምና ሀገር ለማድረግ ከሃሳብ ያለፈ እንቅስቃሴ አለ!

( ክፍል ሁለት )

አንዳንድ ግለሰቦችና ማኅበራት ማለትም ማኅበረ ቅዱሳንና አፈቀላጤው ዳንኤል ክብረትን  ጨምሮ ባለፉት ጊዜያት በኢትዮጵያ ውስጥ ስላለው የእስልምና አክራሪ እንቅስቃሴ የምስል፤የጽሁፍና  የድምጽ መረጃ ለማቅረብ ሞክረው ነበር። እነዚህ ክፍሎች የቆሙበትን ዓላማ ወደጎን ትተን በወቅቱ ስለአክራሪ እንቅስቃሴ  የአስጊነት ደረጃ መናገራቸውንም ደግፈነዋል። ቤተክህነቱ ዝምታን በመምረጡና መንግሥትም ለማዳመጥ ባለመፈለጉ በሎሌችም ወገኖች ጭምር ሲነገር የቆየው ችግር ዛሬ ላይ ለያዥ ያስቸገረ እስከመሆን ባልደረሰም ነበር።

  መንግሥት አብዛኛውን ጊዜ እሱን የሚጠቅም መስሎ እስከታየው ድረስ  ሊያስከትሉ የሚችሉ ጉዳቶችን ከኢምንት ይቆጥራቸዋል ወይም ይንቃቸዋል።  የማንም ስስ ስሜት ተጎዳ አልተጎዳ፤  የራሱ ጉዳይ  እስከማይመስለው ድረስ የሚሰሙ ድምጾችን ወደጎን ትቶ ረጅም መንገድ  በመሄድ  ዓላማውን ሲተገብር  የሌሎች መንጫጫት ግድ የሚሰጠው  አይደለም።  በዚህ የተነሳ ጠቃሚ የልማት እንቅስቃሴዎች ሳይቀሩ እንደጉዳት የሚታዩበትን አጋጣሚ እየፈጠሩ ይገኛሉ።

  ኢትዮጵያ ውስጥ የእስልምና አክራሪ እንቅስቃሴ ስለመኖሩ ሲነገር የቆየው ረጅም ጊዜ አስቆጥሯል። ችግሮች ገዝፈው የስጋት ደረጃቸው ከማደጉ በፊት አስፈላጊውን እርምት በወቅቱ መውሰድ ሲገባው አሁን ተበጠበጥኩኝ ብሎ ዛሬ ላይ ተነስቶ «ሐረካት» በሚል ድምጽ እሱም በተራው ቢጮህ  ማን ይስማው?  ለዓመታት በአክራሪዎች ጉዳት ያለቀሱ ወገኖችን እምባ ማበስ አቅቶት  ዛሬ ምን አገኘ? የሚሉ ጥያቄዎች የሚሰሙት ለዚህ ይመስለናል። በአጭሩ በወቅቱ የእኛ የተጎጂዎችን  ድምጽ ለመስማት ባለመፈለግህ አሁን በተራችን ያንተን ድምጽ አንሰማም ነው እየተባለ ያለው። ችግሩ አክራሪዎች የሉም ማለት ሳይሆን በአክራሪዎች ላይ መወሰድ የነበረበት የእርምት እርምጃ ዘግይቷል ነው የሚሰማው ድምጽ።  ይህንን የጊዜ መተላለፍን አጋጣሚ ደግሞ የፖለቲካ ነጋዴዎች ይጠቀሙበታል። አክራሪ፤ ተጎጂ፤ መንግሥትና ፖለቲካ በየራሳቸው መንገድ ሄደዋል።

ሌላው ችግር ልማት የሚባለው ነገር ነው። በመሠረቱ ልማት ለአንድ ሀገር እድገት ወሳኝ ነው። ለድህነታችንም  ዋናው ምክንያት ልማት አለመኖሩ ነው። ይህንን ችግር ለመቅረፍ መንግሥት ቢሰራ የሚጠላ የለም።  በእርግጥ መንግሥትን የሚጠሉ አካሎች ልማቱን በአሉታዊ ጎኑ በመፍታት ለትርፍ አይሰሩበትም አይባልም። መንግሥት አሉታዊ ጎኖችን ለመቀነስ የልማቱን ሃሳብ በሕዝብ ልብ ውስጥ ከማስቀመጡ በፊት በራሱ ጉልበት ለመወጣት ይፈልጋል። ከዚህ ውስጥ የዛሬማ ወንዝ የስኳር ልማት ተጠቃሽ ነው። ከዋልድባ ገዳም ጋር የሚዋሰነውን የስኳር ልማት ለማስፋፋት መንግሥት አስቀድሞ ወደሕዝብ ማወያየት መግባት ያልፈለገው ፤ አወያይቶ የሚመጣውን  የእምቢታና የተቃውሞ ድምጽ ከማስተናገድ ይልቅ ሥራውን ጀምሮ የሚመጣውን ተቃውሞ ማቃለል ይሻላል ከሚል እሳቤ የተነሳ ይመስለኛል።  ይህ  የልማት ስልት ከእስልምናው የሰለፊ እንቅስቃሴ ጋር በተመሳሳይ ጊዜ በመደረጉ ዋልድባ ተነካብን ከሚሉ ሰልፈኞች ጋር በአንድ ጎራ የማይስማሙትን እንዲስማሙ እድል ከፍቷል። ጳጳሳት ነን የሚሉቱ ሳይቀር «አላህ አክባር» የሚል አዛን እስከማሰማት የደረሱት የፍቅር መጠናቸው ዛሬ ድንገት ስለጨመረ ሳይሆን መንግሥት ሁለቱንም  ወገኖች ምን ያመጣሉ? በሚል ስንጥር  በአንድ ወቅት ስለወጋቸው ብቻ ነው። ይህ ደግሞ ለፖለቲካ ነጋዴዎች ጥሩ የትርፍ ጊዜ ነው። ንግድ ደግሞ አዋጭ ቦታና ሰዓት ይጠብቃል። እውነት ለመናገር በዚህ የተነሳ «ጂሐዳዊ ሐረካት» የተባለው ፊልም ከቀልድ ጫወታነቱ ያለፈ አልሆነም።