ሃሌ ሉያ

የሕይወታችን ባለቤት፤ የመዳናችን ዋስትና፤ የዘላለማዊነት ርስት ለሆነው ለእግዚአብሔር ብቻ የተገባ ይህንን የግጥም ምስጋና ስለወደድነው ከቤተ ጳውሎስ ብሎግ ላይ ወስደን አካፍለናችኋል። ለመዳናችን ሌላ ምስጋና ለማን? ዳዊትም ያለው ይህንን ነው።

መዝ 44፤20-21

የአምላካችንን ስም ረስተንስ ቢሆን፥ እጃችንንም ወደ ሌላ አምላክ አንሥተንስ ቢሆን፥

እግዚአብሔር ይህንን አይመረምርም ነበርን? እርሱ ልብ የሰወረውን ያውቃልና።

ቤተ ጳውሎስ ማክሰኞ ሐምሌ 8/2004 ዓ.ም.

ሃሌ ሉያ ለአብ
ሃሌ ሉያ ለወልድ
ሃሌ ሉያ ለመንፈስ ቅዱስ
ሃሌ ሉያ በአርያም ላለኸው
ሃሌ ሉያ በልቤ ለነገሥከው
ሃሌ ሉያ ለጥልቁ መሠረት
ሃሌ ሉያ ለምጥቀቱ ጉልላት
ሃሌ ሉያ ለዳርቻዎች ወሰን
ሃሌ ሉያ ከአድማስ ወዲያም ላለኸው
ሃሌ ሉያ ዓመታትን ላስረጀው
ሃሌ ሉያ ሕዝቡን ለታደግኸው
ሃሌ ሉያ ብርሃናትን ለፈጠርከው
ሃሌ ሉያ ስሜን ለለወጥከው
ሃሌ ሉያ ለድካሜ ምርኩዝ
ሃሌ ሉያ ለምስኪንነቴ ሞገስ
ሃሌ ሉያ ለተጨነቁት ዕረፍት
ሃሌ ሉያ ለታወኩት ፀጥታ
ሃሌ ሉያ ሸክም ለተጫናቸው ወደብ
ሃሌ ሉያ ስንጥቁን ልቤን ገጥመህ ለያዝከው
ሃሌ ሉያ በመጽናናትህ ለጎበኘኸኝ
ሃሌ ሉያ ከጥልቁ ስጮህ ለሰማኸኝ
ሃሌ ሉያ ከደጅ ስፈልግህ በውስጤ ላገኘሁህ
ሃሌ ሉያ በማይቻለው ቀን ለቻልኩብህ
ሃሌ ሉያ ለባልቴቲቱ ዳኛ
ሃሌ ሉያ ለሙት ልጅ ሰብሳቢ
ሃሌ ሉያ ለበረሃ ጥላዬ
ሃሌ ሉያ ለምድረ በዳው ጓደኛዬ

የሰናዖር ማበር

በትልቅ ቸርነት ሌሊቱን አንግቶ

በጽልመቱ ቦታ ፀሐይን አብርቶ

ጨለማን በብርሃን ለለወጠ ጌታ

ምስጋና ሊያቀርቡ፤ ሊያደርሱ ሰላምታ

ወፎች እንኳን አውቀው ሲያሰሙ እልልታ

ክፉ ማኅበር ክፉ  ያነሰ ከእንስሳ

ጠዋት ከመኝታው ከእንቅልፉ ሲነሳ

በስመ አብ ብሎ ማመስገን ሲገባው

መርዝ ሃሳብ ያወጣል ጠማማ ልቡናው

ከደካሞች ጋራ እንዳይኖር ተስማምቶ

ተንኰል የሚዘራ ከመካከል ገብቶ

«የዘመኑ ምዕራፍ»

*የዘመኑ ምዕራፍ*

                    (by dejebirhan)

ከህይወት ጎዳና – ወጥቶ ከመንገዱ

ከወደላይ ትቶ - የምድሩን መውደዱ

ነፍስያውን ሽጦ - ውረድ መዋረዱ

ነፍሱን ከሞት ገደል - ሰቅሎ በፈቃዱ።

                  እረፍት የለሽ ኀፍረት - ተከትሎት ኋላ

                  ከጥልቁ ሰጠመ – ሞኝ ሆኖ ተላላ

                  ብራሪው በረረ - ጥልማሞት አጠላ

                   በሀጢአት ፓራሹት – በበደል ዣንጥላ።

 አረፈ በማለፍ - አለፈ በማረፍ

 ሲብከነከን ኖሮ - ሲበርና ሲከንፍ

 ኑረቱ ጨለመ - አንዳችም ሳያተርፍ

 እስከዚያው ነበረ - የዘመኑ ምዕራፍ።

ምን አለበት?

አዳምና ሔዋን

***********

አንተ አዳም ራስ ነህ

ብሏል ቅዱስ ቃሉ፤

አንቺ ሔዋን አንገት ነሽ

ብለው ያወራሉ

እንግዲህ ተስማሙ

አንተ ራስ፤

እርሷ አንገት፤

ብታሽከረክርህ …..

ታዲያስ ምን አለበት?
**********
ከደረጀ በላይነህ

ከፈጣሪ አይደለም

        እግዚአብሔር ፍቅር ነው!

ሲለጉን ተደፋን፣ ሲገርፉንም ጮኽን

ሲስቡን ተሳብን፣ ሲገፉን ተገፋን

ሲመቱን አመመን፣ ሲጥሉን ወደቅን

ሲሰብሩን፣ደቀቅን፣ሲገድሉንም ሞትን

እንደሆነው ሆነ፣ የሆነው ሆነብን፣

 ከቶ ምንም የለም፣ ያልሆነው የሚሆን።

                 ከሆነውም ሁሉ፤ የሆነብን ነገር፣

                ሥረ መሠረቱ፣ የኩነቱ ምስጢር

               የክስተት እንግዳ፣ ድንገት የሚፈጠር

               ከፀሀይዋ በታች ከቶ አዲስ ነገር

             አምላክ ያላወቀው የለም በዚህ ምድር።