የቅዱስነታቸው ቀብር በደማቅ ሁኔታ ተፈጸመ።

የጽሁፍ ምንጭ፤ ዓውደ ምሕረት

በ76 ዓመታቸው ያረፉት የብጹዕ ወቅዱስ ዶ/ር አቡነ ጳውሎስ ቀዳማዊ ፓትርያርክ ርዕሰ ሊቃነ ጳጳሳት ዘኢትዮጵያ ሊቀ ጳጳስ ዘአክሱም ወእጨጌ ዘመንበረ ተክለ ሃይማኖት የአለም የአብያተክርስትያናት ምክር ቤት ፕሬዝዳንት ፤ የዓለም ሃይማኖቶች ለሰላም የክብር ፕሬዝዳንት ፤ የዓለም ሰላም አምባሳደር ስርዓተ ቀብር ዛሬ ነሐሴ 17 2004 ዓ.ም. ከቀኑ 7፡30 ላይ በደማቅ ሁኔታ በመንበረ ጸባኦት ቅድስት ስላሴ ካቴድራል ተፈጽሟል፡፡

የቅዱስነታቸው ስርዓተ ቀብር ላይ ቁጥሩ እጅግ በብዙ ሺህ የሚቆጠር ሕዝብ የተገኘ ሲሆን ጊዚያዊ ጠቅላይ ሚኒስቴሩን አቶ ኃይለማርያም ደሳለኝን ጨምሮ የእህት አብያተ ክርስቲያናት አባቶች የአዲስ አበባ ከተማ ከንቲባ አቶ ኩማ ደመቅሳ ፤ የህዝብ ተወካች ምክር ቤት አፈ ጉባዔ አባ ዱላ ገመዳ ፤ ምክትል አፈጉባዬ ወ/ሮ ሽታዬ ምናለ፤ አምባሳደሮች፤ የህዝብ ተወካዮች ምክር ቤት አባላት እና ወዳጅ ዘመዶቻቸው በተገኙበትና በአክሱም ካሕናት እምቢልታ የታጀበ የቀብር ስነ ስርዓት ተደርጎላቸዋል።

አቡነ ገሪማ የህይወት ታሪካቸውን ያነበቡ ሲሆን የእህት አብያተ ክርስቲያናት ተወካዮች እና የመንግስት ባለስልጣናትም ንግግር አድርገዋል። ሥነ ስርዓቱ በፖሊስ ማርሽና የሰንበት ተማሪዎችም ዝማሬ የታጀበ ነበረ።

በትናንትና ዕለት የጀመረው እጅግ ደማቅ የነበረው ስነስርዓትም በዛሬው ዕለት ፍጻሜውን አግኝቷል። ትናንትና ከቅዳሴ በኋላ የቅዱስነታቸው አስከሬን በሰረገላ ሆኖ ከመንበረ ፓትርያርክ ቅድስተ ቅዱሳን ማርያም ገዳም ወደ መንበረ ጸባኦት ቅድስት ስላሴ ካቴድራል በርካታ ብጹዓን ሊቃነ ጳጳሳት የእህት አባተ ክርስታናት ተወካዮች፤ የመንግስት ባለስልጣናት ፤ የገዳማትና የአድባራት አስተዳዳሪዎች ፤ በሊቃውንተ ቤተክርስትያን በሰንበት ትምህርት ቤት ወጣቶች ፤ በአዲስ አበባ ፖሊስ ሰራዊት ባንድ ፤ በምዕመናንና በምዕመናት በክብር ታጅቦ በደመቀ ስነስርዓት የተካሄደውን የሽኝት ስነስርዓት ተመልካችን እጅግ አስደሳች ነበረ።

ከምሽቱ 2፡00 ጀምሮ እስከ ንጋቱ ድረስ ለሊቱን በሙሉ ጸሎተ ማህሌት ሲከናወን አድሯል ። ንጋት 12፡30 ላይ አስከሬኑ ባለፈበት በቅድስት ስላሴ ካቴድራል በብጹአን አበው ሊቃነ ጳጳሳት እና አኅት አብያተክርስትያን ተወካዮች ባሉበት ስርዓተ ቅዳሴው ተከናውኗል ፤ ጸሎቱ እንዳበቀ የቅዱስነታቸው አስከሬን በክብር ታጅቦ ወደ አውደ ምህረት ወጥቷል በተዘጋጀለት ቦታ ላይ ለሰዓታት አርፏል፡፡

ይህን ተከትሎም ስነስርዓቱ የጀመረ ሲሆን የደመቀ የሚለው ቃል ሊገልጸው ከሚችለው በላይ ባማረ ሁኔታ የቀብሩ ስነስርዓት ተፈጽሟል።

የብጹእ ወቅዱስ አቡነ ጳውሎስ ሥርዓተ ቀብር ሐሙስ ይፈጸማል፤ መጪው ዘመንስ ምን ይመስል ይሆን?

ብጹእ ወቅዱስ አቡነ ጳውሎስ ከዚህ ዓለም በሞት ከተለዩ እነሆ አንድ ሳምንት ሊሆናቸው ነው። የሚወዷቸው አዝነዋል፤ የሚጠሏቸውም ደስ ተሰኝተዋል። አንዳንዶች ቢጠሏቸውም እንኳን ሞት የጋራ ርስት መሆኑን በማመን እግዚአብሔር እረፍቱን ይሰጣቸው ዘንድ ከልባቸው ተመኝተዋል።

አብዛኛው ሕዝብ ደግሞ መጪው ዘመን ለቤተክርስቲያንም ሆነ ለሀገሪቱ ምን ይመጣ ይሆን? በሚል ሃሳብ ረጅሙን ጊዜ በማስላት ይጨነቃል። በእርግጥም ሟቾች ጥፋትም ይስሩ ልማት ላይመለሱ ሄደዋል። የነበሩበት ቦታ ትልቅ የመንፈሳዊና የሥጋዊ ሥልጣን ደረጃ በመሆኑ ቤተክርስቲያኒቱን በመንፈሳዊ አባትነት ሊመራ የሚችልን ሰው በማግኘት አንጻር ቢያሳስበን አይገርምም። በስጋዊ ሥልጣን ደረጃም እንደዚሁ በሀገር መሪነት ደረጃ የሚመጣው ሰው የነበሩ ድክመቶችን በማስተካከል፤ የታዩ ጥንካሬዎችን ለማስቀጠል ስለመቻሉ ቢያሳስበን እንደዜጋ ከተገቢነቱ የወጣ አስተሳሰብ አይደለም።

 ቀና ቀናውን አስበን፤ መጪውን ጊዜ ብንፈራ ሰው ነንና ተገቢ ነው።

ይሁን እንጂ ክፉም ሆነ ጨካኝ ገዢ የሚመጣብንና የመጣብን መሪዎች ክፉ ወይም ደግ ለመሆን ስለፈለጉ ሳይሆን ለእንደዚህ ዓይነት ሰዎች ተላልፎ የተሰጠ አምልኰ ስላለን መሆኑን አምነን ልንቀበል ይገባል።

እግዚአብሔር ለዳዊት በተናገረው ቃል ላይ ከወገቡ የሚወጣው ልጅ እንደሕጉ ከሄደ መልካም የሆነው ነገር ሁሉ ከፈጣሪው እንደሚሆንለት፤ ክፋትን በፈጸመ ጊዜ ደግሞ የሰው መቅጫ በትር እንደሚላክበት በመጽሐፍ ቅዱስ ተገልጾ ይገኛል።

2ኛ ሳሙ 7፤14

እኔም አባት እሆነዋለሁ፥ እርሱም ልጅ ይሆነኛል ክፉ ነገርም ቢያደርግ፥ ሰው በሚቀጣበት በትርና በሰው ልጆች መቀጫ እገሥጸዋለሁ ።

እኛ ደጎችና የእግዚአብሔር ፈቃድ ፈጻሚዎች ሆነን ቢሆን ኖሮ እግዚአብሔር በቅጣት ወይም በመከራ ውስጥ አይተወንም ነበር። ስለዚህ ለሆነውና ለሚሆነው ሁሉ ጥፋተኞች እኛ እንጂ ሌላ ማንም አይደለም። 

ኢዮብ 34፤12    

በእውነት እግዚአብሔር ክፉ አይሠራም፥ ሁሉንም የሚችል አምላክ ፍርድን ጠማማ አያደርግም።

የሚያሳዝነው ነገር ኢትዮጵያውያን በማንነታችን ስንመዘን ፊታችንን ወደእግዚአብሔር ለመመለስ ፈቃደኞች ያልሆንን እልከኛ ህዝቦች መሆናችን ሲታይ መከራ የምንለው ነገር ማብቂያው ገና ረጅም ነው። ከጣዖት አምልኰ ገና አልተላቀቅንም። አምልኮቶቻችን ብዙዎች ናቸው። እግዚአብሔርን በከንፈሩ የሚያከብር በልብ ግን ከፊቱ የራቅን ሕዝቦች ነን። ከመበላላት ገና አልወጣንም። ሥልጣንን ጠልፎ ለመውሰድ ከሚደረግ የሽንገላና የተንኮል ተግባር ገና አልተላቀቅንም። ቤተክህነቱም ሆነ ቤተመንግሥቱ ለእግዚአብሔር ይገዛ ዘንድ ለፈቀደ ሕዝብ ገና ዝግጁ አይደለም።  ሁሉም ያሰፈሰፈው ለወንበሯ ነው። ሀገሪቱ በሃሳብ ነውጥ ተወጥራለች። ሰላም ነን እያልን ራሳችንን ካልሸነገልን በስተቀር አየሩ በሁከትና በሃሳብ ተበክሏል። ይህ ካልጸዳ የሀገሪቱ ችግር አላባራም ማለት ነው። አዎ መጪው ዘመን ያስፈራል። አመላችንና አኗኗራችን ገና አልተስማማም።

የክቡር ጠቅላይ ሚኒስትር አስከሬን ወደ ሀገር ቤት ተመለሰ።

የጠቅላይ ሚኒስትሩ አስከሬን ትናንት ማታ አራት ሰዓት አካባቢ ቦሌ አውሮፕላን ማረፊያ ደርሷል። ሚኒስትሮች፤ አምባሳደሮችና ቤተሰቦቻቸው በተገኙበት አስከሬናቸው ታጅቦ ወደ ቤተመንግሥት አምርቷል። ብዙዎችም በልቅሶ ሸኝተዋል። የቀብር ሥርዓቱን የሚያስፈጽሙ አባላት የተዋቀሩ ሲሆን ወደፊት በሚገለጽ መርሃ ግብር ቀብራቸው እንደሚፈጸም ቀደም ሲል ተገልጿል።

ላለፉት 21 ዓመታት የሀገሪቱ መሪ ሆነው ያገለገሉት ጠቅላይ ሚኒስትር መለስ ዜናዊ ከዚህ ዓለም በሞት መለየታቸውን በመንግሥት ቴሌቪዥን ከተለገጸ በኋላ መንግሥታዊና መንግሥታዊ ያልሆኑ ድርጅቶች፤ ታዋቂ ግለሰቦች፤ የውጭ ሀገራት መሪዎችና ዲፕሎማቶች የሀዘን መግለጫዎቻቸውን እየላኩ ይገኛሉ። የኢትዮጵያ ቴሌቪዥንም የጠቅላይ ሚኒስትሩ ሥርዓተ ቀብር እስኪፈጸም ድረስ የሀዘን ቀን እንዲሆንና የሀገሪቱም ሰንደቅ ዓላማ ዝቅ ብሎ እንዲውለበለብ መወሰኑን አውጇል።

በዚሁ በተቃራኒ መልኩ በጠቅላይ ሚኒስትሩ ሞት ደስ የተሰኙ፤ የኢትዮጵያ ነጻነትና የፖለቲካ አፈና አበቃለት የሚሉ፤ እኛ መግደል ቢያቅተን እግዚአብሔር ወይም አላህ ገደልልን የሚሉ ድምጾች እየተስተጋቡ ይገኛሉ። በተለይም ከወደ ዳያስፖራው ያሉ ኢትዮጵያውያን እንኳን ሞቱልን የሚሉ ጥቂቶች አይደሉም።  በተለይም በፓልቶክ የቀጥታ ውይይቶች ላይ «ዛሬ ነው ድሌ» የሚሉ ጭፈራዎችን ሲያስተጋቡ መስማት አስገራሚው  ነው። በእርግጥ አቶ መለስን ጠንካራ፤ ታታሪ፤ ብልህና አዋቂ አድርገው የሚደግፏቸው ጥብቅ  አጋርና ወዳጆች እንዳሏቸው ሁሉ እንደ ማንኛውም ሰውና እንደ አንድ ሀገር መሪ ሊኖርባቸው በሚችል ሰውኛ ድክመቶች፤ የሚወቀሷቸው ወይም ባለባቸው ጉድለት የሚያዝኑባቸውም ጥቂቶች አይደሉም።

ነገር ግን እግዚአብሔር እንደወደደ ባደረገው ስልጣኑ ላይ ገብተው የሚጠሏቸው ሰዎች በመዝፈን፤ በመሳለቅና «ዛሬ ነው ድሌ» በማለት በሞት ላይ ፌሽታ ማድረግ በምንም  መመዘኛ ከሰብአዊነት አእምሮ የሚነጭ ሊሆን አይችልም።

ደጋፊዎችም ጠቅላይ ሚኒስትሩን ፍጹማዊ ሰው እንደነበሩ አድርገው ከማሰብ እንዲርቁ፤ የሚጠሏቸውም በሞታቸው እልል ከማለት የጥላቻ ሁሉ ጥግ እንዲወጡ ለማስገንዘብ እንወዳለን። 

ሞት የሁሉም ሰው ጽዋ ነውና ከፊታችን ባለው ነገር ላይ ደስ ከመሰኘት ይልቅ ከሞት በኋላ ባለው ሕይወት ውስጥ የእያንዳንዳችን ድርሻ ምን ሊሆን እንደሚችል ማሰቡ ላይ ማተኮሩ የተሻለ ነው።

በሌላ መልኩም «ደጀ ሰላም» ብሎግ የቅዱስ ፓትርያርኩ የጠለቀ ሀዘኑን በመግለጽ የብሎጉን የፊት ገጽ ለዚሁ መግለጫ ማዋሉን ስንመለከት ደጀ ሰላም ብሎግ፤ ፓትርያርኩ ከሞቱለት በኋላ እንደዚህ ፍቅር ያሲያዘው ነገር አልገለጽ ብሎናል። ምክንያቱም ስማቸውን ሲያጠፋ፤ የሙስና አባት፤ የቤተክርስቲያኒቱ ጠላቶች ወዳጅ፤ የተሀድሶዎች ጋሻ እያለ ሲጠራቸው እንዳልነበርና፤ በስልጣን ላይ እስካሉ ድረስ የቤተክርስቲያን ሰላም የለም ይል የነበረውን ዘገባዎቹን ሁሉ ትቶ አሁን የልብ ወዳጄና ዘላለማዊ እረፍት ሊያሰጣቸው የሚችል የመልካም ስራ ባለቤት ናቸው ብሎ ያመነ በመምሰል ከአብርሃም እቅር ይረፉልኝ ማለቱ ተሳልቆ ካልሆነ በስተቀር ሲወዳቸው ለኖረ አባት የቀረበ ጸሎት አይደለም። ድሮም ክፉ ሰው በከንፈሩ ይሸነግላል ተብሎ ተጽፏልና ይህ ሸንጋይ ድረ ገጽ ከሞቱልኝ ወዲህ ምን አገባኝ፤ ከአብርሃም እቅፍ ያኑርልኝ የማልል፤ ባለቤቱ ከፈለገ እንጦሮጦስ ይጨምራቸው የሚል የክፉ ሰው ሽንገላ ጸሎት ካልሆነ በስተቀር ደጀ ሰላምና አባ ጳውሎስ ዓይንና ናጫ እንደሆኑ እስከሞታቸው ድረስ መዝለቃቸውን ማንም ኅሊና ያለው ሰው ያውቀዋል። አንድም ቀን በሰላም አባትነት፤ በእምነት አባትነት፤ በፍቅር አባትነት፤ አመስግኗቸው እንደማያውቅ የማናውቀው ይመስለው ይሆን?

ደጀ ሰላም ሆይ እስኪሞቱልህ ድረስ ስትወቅሳቸው ኖረህ፤ ከሞቱልህ በኋላ መጸለይህ ለእሳቸው ያለህን ፍቅር እየገለጽህ ነው ወይስ ቋሚዎቹን ሰዎች እንደምወዳቸው እወቁልኝ ለማለት ነው? የልብንማ እግዚአብሔር ይመረምራል።